Aizawl, May 30, 2022 : NGO Co-Ordination Committee chuan Mizo fa, chief secretary (CS) ni tura tling leh thei an awm chhung chuan ram leilung fa, Mizote duhsak an phut tih an sawi. A ram leilung fa ngei chief secretary-a dah a nih theih nan chief secretary nilai office kai tur chu naktuk atangin dan an tum tih an sawi.
Vawiin khan Mizoram chhunga NGO lian Central YMA, MUP, MHIP, MZP, MSU te telna, NGO Co-Ordination Committee telna, NGO Co-Ordination Committee chuan thuthar thehdarhtute an kawm a, vice president, prime minister, Mizoram governor, union home ministry, ministry of home affairs te hnenah Mizoram chief secretary-a Mizo ngei an awm theih nan ngenna tum engemaw zah an thehluh tawh thu an sawi a, an ngenna te chuan ngaih pawimawh a hlawh lo niin an sawi bawk.
NGO Co-ordination committee chuan Chief secretary ni mek chu a mimal taka dona an nei lo tih an sawi a, Hetih mek lai hian he dinhmun chelh thei tur Mizo IAS an awm reng lai leh sorkar leh mipui aw ngaithla duh lova sorkar laipui hmalakna hi zawm har kan ti a ni, an ti.
Mizo chauh chief secretary-a awm turin beisei theih a ni lo tih an hmuh pui rualin, tling leh thei an awm chhung chuan ram leilung fa, Mizote duhsak an phut tih an sawi a. All India service cadre hran Mizoramin a neih theih nan vice president, prime minister, union home minister te hnenah pawh ngenna thehluh a nih tawh thu an sawi bawk.
Delhi sawrkar a additional CS (urban development) a nih lai a Mizoram CS tura dah, Renu Sharma hi Mizoramah kum 2012 khan commissioner & secretary GAD, Finance in a lo awm tawh a, principal secretary Home leh DP&AR a lo ni tawh bawk.
Post a Comment