Rauthla, April 4, 2022 : MPL U-18 khel tur Aizawl FC U-18 Academy-ah Lawngtlai tlangval, Council Venga cheng mek S. Lalchema chu a inpet tling a, tunah hian Lengpuiah Aizawl FC Camp-ah a awm mek.
S. Chungliana leh Masungi te fapa S. Lalchema hian Aizawl FC U-18 Academy-a awm tura a inpet tlin dan sawiin, ‘kan hnungkar Thawhtanni khan Sir Laibikliana’n Aizawl FC U-18 trial a awm tur thu min hrilh a, thawhlehni khan Aizawl lamah ka phei nghal a. Thlenna tur chhungte ka neih loh avangin Lai House-ah ka thleng’ a ti.
Ningani khan trial hi Chite Field-ah neih a ni a, hetah hian Mizoram hmun hrang hrang atangin Footballer mi 570 chuang an kal a. Hemi ni hian mi 50 thlan chhuah phawt a ni a, heng zingah hian S. Lalchema hi a tel a. Inrinniah Lengpui Field-ah final selection neih a ni a, hetah hian mi 20 thlan chhuah an ni a. S. Lalchema hi thlan chhuah zingah a tel.
S. Lalchema chuan tun MPL hi season kharna a ni a, academy-ah hian an awm tlang dawn nge, selection thar an nei leh dawn a hriat loh thu a sawi bawk.
Central Midfielder S. Lalchema chuan, ‘football lamah ka kal rau rau a nih chuan national level thlen phak ka tum a, a remchan hunah Shillong Lajong-ah trial neih ka tum’ a ti. Vawiin, thawhtanni atangin training an neih nghal tur thu a sawi bawk.
S. Lalchema bakah hian Sangau tlangval Ngurthanmawia S/o Thawngzama chu Aizawl FC U-18 academy-ah hian a inpet tling bawk.
Post a Comment