Lawngtlai, July 14, 2021 : Dr. LP Malsawma, Chief Medical Officer, Lawngtlai chuan District Hospital-ah Ambulance pahnih an kawl mek thu a sawi a, nimin khan Central YLA Ambulance chu DC, Lawngtlai remruatnain Covid-19 kaihhnawih a remchang apianga hman atan an lak thu a sawi bawk.
Dr. LP Malsawma, CMO, Lawngtlai chuan National Ambulance Service atanga an dawn Bolero Ambulance pakhat, Eco Ambulance pakhat leh Pu C. Ngunlianchunga, MLA donate Eco Ambulance pakhat an neih mek thu a sawi a, Pu C. Ngunlianchunga donate hi Chawngte CHC ah dah a ni a ti a. Central YLA Ambulance chu Covid-19 hri kai hmun pui zawk panpui nan hman tura ruahman a ni a ti. Heng Ambulance an kawl laite hi tun dnhmunah an hman tlak vek a ti bawk. Lawngtlai khaw chhung leh pawn atanga CCC a dah tur hri kai phurh nan ANM Bus hman thin a nih thu leh mi tlem deuh phurh nan Eco Ambulance pawh hman thin a nih thu CMO chuan a sawi bawk.
Covid-19 hri thawhhnihna len hnuah Lawngtlai khaw chhung bika hri kai kan tlakhniam tum July 2, 2021 ah Thingkah IR Bn. Qtrs. CCC ah mi 6 an awm hman a, tun hnaiah hri kan pun chhoh leh avangin tun dinhmuna Thingkah IR Bn. Qtrs. CCC a awm hi 51 niin, Home Isolation-a mi 8 an awm bawk.
Hri kai kan pun chhoh tak chungchangah hian Dr. LP Malsawma chuan, hun reilote chhung kan inthlahdul rah kha niin ka hria a ti a, kan inthlahdul hret hma khan hri hian min luh chhuah nasa tawh hle niin a lang a, inthlahdulin a zawm chiah bawk nen, chu chu kan tuar ta a ni, a ti. Hetih kai hian Curfew kan hman mek hian nasa taka hri kai hmuhchhuah a tih tlakhniam a beisei thu a sawi.
Post a Comment