Kan quarters chhehvelah chuan hmun awl a tam bawk a, lei ka let a, fur behlawi ka tuh a. Ar-in an thai darh mai ka hlauh avangin a hungna tur mau ka pu a. Ni khat chu chhun pachangah phelsep ka siam malh malh a, ka bul velah chuan kan arpui chuan a notê a hruai diah diah a, ka bul lawk lawkahte chuan lei an thai sap sap a. Chutih lai chuan van lamah mu a kawk-kaw-lak lauh lauh reng bawk a.
Hlim taka ar an tlat sap sap lai chuan vawi leh khatah chak lutukin mu chu a rawn bir ta thut a. Ar notê tham nawlh a tum lai tak chuan arpui chu aw-ki danglam takin a hram tuar a, a thla a zar nghal duai a, ar notê zawng zawng chuan an pui thla hnuai an pan khawm zung zung a, an lut kim ta maw tihah chuan arpui chuan a thla chu a khup ta hmiah a. Mu chuan arpui chu a hneh miau loh avangin beidawng takin ramhnuai lamah a thlawk bo ta a ni.
Petera chuan, “Ngaihven ula, fimkhur rawh u; in khingpui Diabola chu sakeibaknei rum thin angin a ei theih tur zawngin a phi ruai thin;” (I Pet 5:8) a ti a. Kan hmelmapa hian min tihchhiat tumin, sual kawng kan zawha kan boral theih nan remchang a melh reng thin. Pathian rawngbawl mekte pawhin hum sual kan daia kan mualpho theihna tur te, rinna kawnga chak lo leh chau tak, tangkai lo taka kan awm theihna turin sum leh pai, zu, sex, thatchhiatna etc hmangtein min bei fo bawk. Pathian rawngbawltu thenkhat chu an mualpho fo tawh thin rêng a nih hi.
Mi thenkhat chuan harsatna an tawh changin (depression neite pawh tiamin), Isuaa tlan luh nachang hre lovin mahnia inchin fel an tum a. Hmelmapa a rawn inrawlh vat a. ‘Ka chakna hmanga ka dovin mualphovin ka tlu leh si thin’ tih hla ang chiahin an mualpho fo va, an beidawng chuan sual kawng an zawh phah a, mahni nunna ngei la pawh an awm thin a, a pawi hle a ni. Isuaa tlan lut duh lo leh amah hlat lutuka awmte chu chhiatnain a hmuak reng a ni. Amah an duh loh avanga an chunga chhiatna lo thleng tur a hriat avangin Isuan, “Aw Jerusalem, Jerusalem! Zawlneiho thattu, i hnena an rawn tirhte lunga lo denghlumtu, arpuiin a note a thla hnuaia a awp khawm angin i fate vawi engzat nge awp khawm ka tum kha! Nimahsela in duh si lo.” (Matt 23:37) a ti ngawih ngawih mai a nih kha.
Hmelmapa laka kan himna turin Lal Isua hian thla a la zar reng a, tlan luh nachang hriate chu an him ang a, an mualpho ngai lo vang. Isua ngeiin, “Kei kawngkhar chu ka ni; tupawh keimahah a luh chuan humhimin a awm ang a, a lutin a chhuak ang a, a ei tur a hmu bawk ang.” (John 10:9) a ti a ni. Isua thlazar hnuaia tlan luh leh awm hi sual leh a hnathawh laka kan himna tur, kan buainate chin fel dan tha ber a nih avangin Isua thlazar hnuaiah i awm tlat ang u.
_Isua hnenah ka him ang, A ângchhung nuamah chuan... Isua hnenah ka him ang, Ka buaina a reh ang... Ka thlarau himna hlu ber, Isua ka tan a thi. Kumkhuaa ka phen tur ber, Chatuan lungpui a ni._
_“LALPA hming chu kulhpui a ni a, Mi fel chu a tlan lut thin a, a him thin.” (Thufingte 18:10)_
*- P.C.Vanlalrova*
Post a Comment