HSSLC result chhuaka Lawngtlai Dist. atanga titha mi pahnihte hnenah chawimawina pek a ni 



Lawngtlai, July 31, 2021 : Lawngtlai DC Conference Hall-ah nimin khan Bawrhsap Dr Andrew H. Vanlaldika hovin Lawngtlaia Independence Day 2021 hman dan tur rel a ni a. State sawrkar leh LADC hnuaia department, VC Association, District MJA leh pawl hrang hrang ai awhte an tel.

Chairman Dr Andrew H. Vanlaldika chuan COVID-19 hri leng vangin kum dang angin Independence Day chu hman theih a ni dawn lo tih sawiin, state sawrkarina hman dan tur a ruahman dan a sawi fiah a. Ram ni pawimawh a nih ang ngeia khunkhan tak si, COVID-19 laka fimkhurna dan zawm chung sia hman dan ngaihtuah turin kal khawmte chu a sawm a ni.

Meeting chuan kumin Independence Day lawmna hi Central YLA Playground-ah zing dar 8:00-ah hman ni se, tiin a rel a. Kum dang anga sikul naupang atanga parade contingent beisei a rem loh avangin ceremonial parade awm lovin, Mizoram Police Armed Contingent atangin guard of honour beisei a ni.

HSSLC 2021-a Lawngtlai District atanga ti tha zirlai pahnih hnenah chawimawina hlan ni se, tih a ni a. Lawngtlai khawpui chhunga damdawi in pathum, chhawmdawlna in, District Jail leh Covid Care Centre-ah te Independence Day pual tanpuina thilpek pek leh ni se, tih a ni bawk.

Independence Day lawmna atana thil pawimawh hrang hrang bawhzuia hma la turin Technical Committee din a ni a. Department leh tlawmngai pawlte kovah mawhphurhna hrang hrang nghah a ni bawk. Independence Day lawmnaah hian sawrkarin a ruahman angin sikul naupang leh mipui nawlpui tel lova hun hman a ni dawn a. Mipuiin in lam atanga an lo chhim theih turin live coverage-a pek chhuah dan ngaihtuah ni se, tih a ni.

Independence Day ni-ah hian sawrkar office, zirna in leh sawrkar quarters-ah te hnam puanzar zar vek tura tih a ni a. Kum danga Independence Day lawmna puala tournament buatsaih thin chu COVID-19 boruak avangin buatsaih a rem dawn lo a ni.

Post a Comment

Powered by Blogger.