KA TAP TA A!
Pachang zetin ‘Ka tap ta a’ han tih hluai chu a inthlahrunawm hle mai. HSLC kan exam zawh hnuah chuan ‘Nuam singkhaw’ tih mai âwm tak a nih tehreng nen, a ni miah si lo. Pass dawn nge dawn lo tih hriat lawk a nih loh avangin rilru a hah duh hle a, a thawventhlak viau loh! Ka lo passed ve ta mial a nih chuan college kal dan tur ngaihtuah lawk a ngai a. Keini ang thingtlang naupang, chhungkaw harsa taka seilian tan chuan passed ve tehreng pawh ni ila lawmna leh lungngaihna a inzat thial âwm e.
Passed ve tâk hlauhah tiin college kalna tur intuak a ngai a. Naupang mai kan la nih avangin hna rum pui pui thawk tura inhlawh rual kan la ni lo va. Theih ve tâwk, tiin khua atanga Km 5 vela hla Tuichang kama chartin pu turin thian thenkhatte nen kan inthurual ta a. Ni khatah vawihnihte kan pu thleng ve mai bawk. A ni thumna a lo thleng ta! A ro tha tha kan put zawh tawh avangin hnawng deuh cherh churh, rit zet mai chu ka pu ta a, a va rit tehreng em! Khaw thlen hma tlang kan lawn chhuak tep tawh tihah chuan a rit ka ti lutuk chuan ka chartin put lai chu ka keuh chawrh a, ka thu ta hnawk a! Ka koki chu a na ngut ngut a, bulah thiante awm mahse ka insum zo ta ngang lo va, ‘Ka tap ta a’! Ka zep dawn lo, ka tap miau si alawm le.
Chutia ka thut sawp nuai lai chuan ka chartin put let ngat chu ka han en a, “Tho rawh, i thil putah hian buh leh sa a awm a nia,” rawn ti tlat hian ka hria a. Muangchangin ka tho zi thalh thalh a, chu chartin bumro zet chu ka chawi kang a, ka pu leh ta nge nge a. Khua kan thleng a, ka pawisa hlawh hum ran chungin hlim takin kan in ka pan ta hnak hnak a. Chumi ni zet chu a hrehawmin a hlimawm a ni ber e.
Zirna hian thawhrimna a keng tel a, hlawhtling tur phei chuan tuarna nasa tak a keng tel thin. Chhungkaw harsa tak atanga hlawhtling tur ngat phei chuan ‘tahna ruam’ ni âwma mawi a ni a, mittui a ko chhuak fo ngei ang le! Mahse chu kawng zawh tlattute hmalamah chuan ‘Buh leh sa’ a awm si a!
Luka 9:23 kan en chuan, “Tupawhin mi zui a duh chuan mahni hrehawm pawisa lovin, ni tin a kraws puin mi zui rawh se,” tiin Lal Isuan a sawi a. ‘Ka van in nuam tak kawng chu kraws a ni’ tih hla ang chiahin kraws hian van ram a kawh raih avangin ringtu chuan kraws kawng a zawh ngei ngei a ngai a ni. Chu kraws avang chuan hrehawm kan tuar a, kan tap a, kan mittui a tla a, a chang phei chuan rit riauin kan hria a, kan tlukpui lek lek thin a ni lawm ni?
Mahse van khawpui kan thlen hunah chuan kraws put tur a awm dawn tawh lo va, Lal Isua ngeiin, “Lo haw rawh, lo chawl tawh la,” tiin min lo lawm lut ang a, he leia kan dam chhunga kan thawhrim ang zelin lawmman hlu tak pek kan ni dawn a ni. Chutih hunah chuan tah leh mittui tlak a awm tawh lo vang a, Pathianin kan mit ata mittui zawng zawng min hruk faisak tawh ang.
Chu kraws chu pawmin ka vuan zel ang...Lallukhum hlu-ah ka la chan ang.
- P.C.Vanlalrova
Post a Comment