RAUTHLA NEWS LAWNGTLAI

 MIZORAM STATE PROJECT MONITORING COMMITTEE TE THUKHAWM

Rauthla 13.09.2024 : Vawiin khan Chief Minister Pu Lalduhoma hovin CM Conference Hall-ah Mizoram State Project Monitoring Committee te chuan member pum huap thutkhawm tum thumna an nei a. An hmalak tawh chin te an thlirlet.

Member thar te an awm avangin inhmelhriatna hun an nei a, chumi zawhah Member Secretary thar Er. Lalthanzuala Ralte chuan project an endik 25 te report a pe a. Heng project tina thil fel lo nia an hriat an hmuhchhuah leh rawtna an theh luhte chu an sawiho nghal zel a. Hmalak zui dan tur thutlukna an siam a ni.

 AADHAAR CHUNGCHANGA GAD THUCHHUAH

Rauthla 13.09.2024 : Mipuite Aadhaar-a inziak lut tur hian kum bithliah a awm lo a, nausen pianghlim pawh Aadhaar-a ziah luh theih a ni. Nausen piang hlim leh naupang kum 5 aia upa lote chu a nu emaw, a pa emaw Aadhaar number leh a Birth Certificate kengin Aadhaar Enrolment Centre-a ziahluh theih a ni. Heng kum bithliah (kum 0 - 5) te hi Aadhaar Enrolment tihsak an nih hian an thla lak a ni a, biometric chhinchhiahna dang, kutzethla (fingerprint) leh mit note (iris) zia nemkai chu tih a la ngai ve lo.

Naupang chu kum 5 a lo tlinin Biometric Update a ti ngei tur a ni a, a kutzethla (fingerprint) lak leh mit note (iris) zia lak a ni ang. Kum 15 a tlinin Biometric Update a ti leh ngei tur a ni. Heng Biometric Update-te hi kum 5-7 leh kum 15-17 an nihin Aadhaar Enrolment Centre-ah a thlawna tih theih a ni a, hemi ti tur hian thildang ken tel ngai a awm lo. 

Sikul naupangte'n an Aadhaar leh an phone number an thlunzawm hian Sawrkar atanga service hrang hrang dawn leh hmuh theihte awlsam takin a hmuin a dawng thei a ni. Mobile number thlunzawm turin emaw, mobile number thlunzawm sa thlak turin Aadhaar Enrolment Centre pan theih reng a ni a, hemi tur hian kentel ngai thil dang a awm lo.

Aadhaar Enrolment Centre awmna hmunte hi - bhuvanapp3.nrsc.gov.in/aadhaar/ ah hian en theih a ni.

 MIZORAM CSR CELL TE THUKHAWM

Rauthla 13.09.2024 : Vawiin khan Mizoram CSR Cell te chu an chairman Pu TBC Lalvenchhunga, Adviser to CM hovin a office-ah an thukhawm.

Mizoramah CSR Fund rawn pe duh engemawzat awm mah se dan ang taka lo dawng thei turin chak taka hma lak zel a ni a. A bikin project lian hote lo dawnna tur Trust din tura hmalakna te pawh kalpui a ni.

Tunah hian Mizorama CSR fund hmanga thawh theih chi Investible Projects/concept paper khawn khawm leh tur a ni a. Chumi zawh chuan capacity building/ sensitization kalpui leh a ni ang. UNDP in Mizorama CSR kaltlanga hmalakna tam zawk a awm theih nana Bangalore khawpuia programme neih an rawtna pawh meeting hian a remti bawk.

CSR fund hmu mek te, dil tum leh dil mekten an hmalakna CSR Cell kaltlanga an tih zel a ngai hran lova. Amaherawh chu Mizorama CSR fund che vel dinhmun chiang taka chhinchhiah a nih theih nan CSR Cell hi hrilhhriat thin tur a ni. Department, NGOs leh Trusts ten Mizoram tana CSR Fund a tam thei ang ber an haichhuah hi CSR Cell duh ber a ni a, Cell hi chu facilitator mai a ni.

Non-Profit NGO ten tun aia CSR dawn lama hma kan sawn theih nan leh CSR dawng thei NGO tam zawk kan neih theih nan; Income Tax Act 1961 hnuaia 12A emaw 80G Registration nei tawh leh nei tura buaipui mek ten a hnuaia e-mail address kan tarlan ah hian an NGO chungchang lehkha thehlut vek turin an sawm. Thehluhna tur email address chu: cmo-csr@mizoram.gov.in a ni.

Meetingah hian Pu Vanlaldina Fanai, Commissioner & Secretary to CM, Pu Lalmalsawma Pachuau, Secretary, Planning leh member dangte an tel a ni

 AH&VETY Minister India rama AH&Vety Minister intawhkhawmnaah tel

Rauthla 13.09.2024 : Vawiin hian Ministry of Animal Husbandry & Dairying buatsaih, India ram AH&Vety Minister te intawhkhawmna 'Monsoon Meet' chu Convention Centre, Lok Seva Bhawan, Bhubaneswar, Odisha ah neih niin Mizoram AH&Vety Minister Pu C. Lalsawivunga pawh he hunah hian a tel.

He intawhkhawmnaah hian Union Minister Raju Ranjan Singh chu khuallian a ni a, state tin atangin Minister leh official engngemaw zat an kal a ni. He Monsoon Meet hi ranvulha eizawnna leh bawnghnute thar chhuahna kawnga sawrkar hmalakna hrang hrangte sawt zawkna tihhlawhtlin a nih theihnana Sawrkar laipui, State leh UT te inrawnkhawmna leh sawikhawmna a ni.

He hunah hian Minister Pu Lalsawivunga pawhin thu sawiin Mobile Veterinary Unit hnuaia mi chhawrte hlawh Govt. of India atanga release thuai a ?ul thu te, ASF in kan state a tuam avanga kan tawrh nasatzia te, ran vulhtute chhawmdawl an ngaih thu te sawiin Central sawrkar chu hma laksak turin leh vaccine rang taka siam emaw ram dang a?anga lakluh dan kawng dap turin a ngen a. Hri leng awm thar tur ven leh hriselna kawnga Govt.of India in chak taka hma a laknaah Mizoram sawrkar pawhin theihtawp a chhuah mek thu leh a chhuah zel tur thu a sawi a ni.

Minister hi AH&Vety Department atangin Pu C. Laltanpuia, Deputy Secretary; Dr. Thangzadinga, Deputy Director (L&E);  Dr.V. Vanneihtluanga, Deputy Director (LH) ten an ?awiawm a ni.

Rauthla 13.09.2024 : Commerce & Industries Minister Pu F. Rodingliana chuan Pu B. Shyam IFS, Joint Secretary, Ministry of External Affairs (Bangladesh and Myanmar changtu) nen nimin 12.9.2024 (Ningani) khan a office chamber ah inkawmin, Mizoram leh a thenawm ram Bangladesh leh Myanmar te nen a insumdawntawnna tha zawka kalpui dan tur a sawipui.

 Aizawl, the 13th September, 2024: Vawiin chawhma dar 10:00 khan Pu Vanlaldina Fanai, Commissioner & Secretary, General Administration Department (GAD), Govt. of Mizoram kaihhruaiin a Office Chamber, CMO ah kan hma lawk October ni 2, 2024 a India hnampa, Mahatma Gandhi pianchamphaphak lo thleng tur lawm dan tur rel a ni.

Meeting-ah hian Line Department hrang hrangte mawhphurhna leh chanvote ruat fel niin, programme hlawhtlin nana theihtawp chhuah theuh tura chah an ni a. Programme neihna tur hmunhma leh inpuahchahnate enfiah hun atan September ni 30, 2024 chawhnu dar 3:00 ruat a ni.

He hunah hian GAD, Aizawl DC, SP, Sr. SP Traffic, UD&PA, I&PR, PUC leh Horticulture Department aiawhte an tel a ni

Rauthla 12.09.2024 :  Vawiin Ni 12.09.2024 hian Central YLA President Pu HC.Vanlalruatpuia leh a thawhpuite'n Pu B.Shyam, Joint Secretary, Ministry of External Affairs (MEA) Govt of India chu Aizawl State Guest House ah hmu in Kaladan Multi Modal Transit Transport Project leh Border Trade chungchang an sawipui.

Central YLA hruaitute hian Kaladan Multi Modal Transit Transport Project chu tih hlawhtlin a nih ngei theihna tura chak zawka hmalakna kalpui nise an duh thu an thlen a. Tun dinhmun a kawng awm dan te pawh sawiin, Border Trade tur anih avangin he kawng hi India tan hmun pawimawh ani tur anih tlat avanga leh Ram dang mite zalen taka an lo luh lohna turin Immigration Check post te siam tha an tih thu te, Border Commercial Haat buatsaih a tul thu leh Border Fencing te pawh siam a, a hma lama hmalakna kalpui ni thei se, an duh thu Pu B.Shyam hnenah hian an thlen a ni.

Central YLA hruaitute chuan tuna KMMTP hmalakna kal zel ah Lawngtlai to Zorinpuia inkar kawng tlahniam avanga harsatna thleng mek pawh an sawipui a. Tin, hemi kawng lai anih dawna ram neitu eng emaw zat hnenah zangnadawmna tun thlenga pek a la nih loh chungchangah a ram neitute'n harsatna an tawh thu te thlenin, heng mite hnenah an chanvo pek anih thuai theihna tura hma lakpui turin an ngen bawk ani.

Joint Secretary, Ministry of External Affairs Pu B.Shyam chuan, Central YLA hruaitute nen ram tana thil pawimawh leh tangkai tak an sawiho thei chu lawmawm a tih thu a sawi a.  KMMTTP road a hlawhtlinna tur kawngah Central YLA hruaitute chuan mawhphurhna pawimawh tak an neih thu a hrilh a. Indo-Myanmar Border Area a awm an nih ang takin Central YLA te chu Central sorkar te nen pawh thawhhona tha tak neih a tul thu a lo hrilh bawk a. Central YLA hruaitute'n a hnena an thil thlen te pawh a tul ang anga bawhzui a tum thu a lo hrilh ani.

Central YLA hruaitute hi an President Pu HC.Vanlalruatpuia, Gen.Secretary Pu Joseph Lalhmingthang, CEM member Tv.C.Lalhmachhuana leh Pu Lalpuiliana Thanget ten an tel a ni

 Pu C. Lalmuanthanga, CEM LADC hmalaknain, Tuipui Ferry Marboat kai, kawng chhe lai siam tha

Rauthla 12.09.2024 : Dt. 11.9.2024 khan, Tuipui Ferry Marboat Lawngtlai lam kaina chu, kawng a chhiat avangin Motor tan tlan a hrehawm bakah, lirthei tan a him loh avangin, Pu C. Lalmuanthanga, CEM, LADC chuan a siamthat tir.

Pu C. Lalmuanthanga, CEM, LADC chuan, Lawngtlai leh Siaha inkar fur ruahtui tam hun laia   awlsam zawka inkal pawhna tur, Dr Beichhua, MLA Siaha Bialtu zahawm tak maiin, mipui leh lirtheia kal thinte tana tangkai taka an hman tur, Tuipui Ferry-a Marboat a dah hi a lawmawm hle a, chutih laiin Lawngtlai lam kaina kawng atha lo hle a, Lirthei a kalte tan a him lova, harsatna an tawk thin ani tih kan hria a? Chuvang chuan Dt. 11.9.2024 khan helai hmun hi lirthei a zin thinte him zawk nan tiin kan siam that tir a, atul ang zelin hmalak zel kan tum ang, a ti.

 Rauthla 12.09.2024 : Mizoram State Anti-Tobacco Day hi Mizoram Sawrkar hma laknain kum 2014 aṭang khan kum tin September ni 11-ah hman ṭhin a ni a. Kumin hi a ṭum 11-na niin, he ni hmanna pui ber hi a ṭum khat nan Health Minister leh Health department hotute nen Lungleiah buatsaih a ni.

Global Youth Tobacco Survey-2 (2016-17)-in a tar lan dan chuan Mizoramah naupang kum 13-15 inkar zingah zuk leh hmuam ti 58% an awm a, Mizoram leh Arunachal Pradesh chu India rama sang ber a ni mek bawk

Rauthla 12.09.2024 :  Land Revenue & Settlement Minister Pu B. Lalchhanzova chuan Directorate of Land Revenue & Settlement leh Settlement Officer (Aizawl) office te chu nizan khan a tlawh. 

 Mizo Day Vawi 31 na Ropui taka Hman a ni:

Mizo Society of America, Maryland Branch te buatsaih, MIZO DAY (September 2nd, 2024) lawmnaah Chief Minister Pu Lalduhoma chu khuallian a ni a. 

Pu Lalduhoma hian Zofate inpumkhatna lam hawi thu a sawi a. Zofate inlungrualna tur leh insuihkhawm theihna tur thu thahnemngai taka a sawi bakah ramri hung (Border Fencing) chungchanga Mizoram CM a nihna anga Zofate hma hun thlir chunga nghet taka a dinna thu a sawi tel bawk a ni.

Mizo Day lawmna ah hian Chief Minister Discretionary Fund atan US $37,460.00 an thawh a. Pu Lalduhoma hnenah President’s Liftetime Achievement Award hlan a ni bawk a, MSA Maryland branch-in a lawmpui tak zet a ni.

Mizo Day ah hian USA state 11 atangin Zohnahthlak hnam peng hrang hrang mi 700 vel an kal khawm a, hnam lam leh hnam thuamte entirin, kum upa chawimawina te, zirlai graduate chawimawina te an neih bakah program zawhah ruai an theh a ni.

 PRESS STATEMENT OF LALTAWNLIANA, PRESIDENT MPYCC

December ni 8.2023, ZPM sorkar lakluhni khan Lalduhoma chuan ni 100 chhunga an tihtur hlim takin a puang a, kumin 2024 hi sorkarin sum inrenchem kum atan a puan thu te, chumi atan Chief Minister, Minister leh MLA ten 4th grade an neih theih chin tih tlem a nih tur thu leh Chief Minister, Minister leh MLA te tan lirthei kawl theih chin pawh tih tlem a nih dawn thu bakah Chief Minister, Minister leh MLA te tan lirthei lei a nih loh tur thu a sawi.

Hetiang a nih lai hian Chief Minister hian motor 5 a kawl bakah officer thenkhat CM Office-a hman turin an motor kawl lai a chhuhsak bawk. (Chief Minister duh angin MZ-O1 M 7012 TUV chu Chief Minister Office-ah a hma thei ang bera thawn tur a ni - MZ-O1 M 7012 TUV to the Chief Minister's office at the earliest as desired by the Chief Minister). 

Hetiang a nih chhoh hnuah tunah hian Chief Minister Escort Vehicle atan tih chhuanlamin Chief Minister hman tur Mahindra Thar pathum lei leh niin he motor hian August thla khan Mualpui, Aizawl a thleng tawh a. Tunah hian Police Headquarters, Aizawlah Document tih fel ngai a la awm avangin kawl mek a ni. Heng motor pathum te hi MZ 01 AC 1900, MZ 01 AC 1901 leh MZ 01 AC 1902 te niin Pu Lalduhoma'n an rintlak lo, keimah min beitu tia a sawi Director General Of Police, Mizoram hminga Register a ni nghe nghe a ni. 

Chief Minister Escort Vehicle atana lei Mahindra Thar Model pakhat pawh hi nuai 17 man niin pathum leina atan hian mipui sum cheng nuai 51 teh meuh sen ral a ni leh ta. Hemi hma hian Mizoram Assembly Speaker Motor Mahindra XUV lei nan Nuai 28 leh Assembly Speaker Quarter chei nan cheng nuai 23 hman niin; Speaker Motor leina leh Quarter chei nan mipui sum cheng nuai 51 tehmeuh sen ral a ni tih RTI chhanna leh Speaker Press Conference ah a chiang bawk.  

Mizoram Journalist ten an hna leh an chanchinbu/Electronic Media lama harsatna tam tak an tawh lai, sorkar hnathawk ten hlawh an lak theih loh lai leh mipui phurrit tura petrol leh diesel chhiah nasa taka an tihpun a, road maintenance Cess thlenga an tih pun laia inrenchem sawitu berin Escort Vehicle tih chhuanlama mipui sum cheng nuai 51 man lai senga motor a lei hi mipui zahlohna leh palzutna dik tak a ni.

Tun hma sorkar lo awm tawh te'n an lak duh loh Social Infrastructure & Services Cess leh Road Maintenance Cess-ah Petrol leh Diesel thliar hrang miah lovin 1 litre ₹ 2 ve ve; a vaiin ₹ 4/- ngawta ZPM sorkarin an dah ta hi Congress thalai leh Mizoram mipui te'n kan hrethiam lova. He tax tihpun duh lohna lantirna pawh kan lo nei tawh a nih kha. Congress-in kan ngaihtuah ber chu mi hnuaihnung zawk leh mi rethei zawkte hi an ni reng a ni.

Sorkarna chelhtuten uchuak taka mipui sum hmanga an invulh nasat em avangin tun hnaiah mipuiah sum leng vak a tlem em em a. Hei hian nasa takin ruihhlo tawlh a ti hluar a, khawlaiah Kuhva lei ang maia lei tur ruihhlo a awm mek a. Nitin ruihhlo man, ruk ruk, in suam, in thah, in rawk, ruangchhar, pawngsual leh sualna dang a pung hle a. He'ng hi sorkar sum enkawl thiam lohin a hrin chhuah a ni. 

Hetih lai hian ZPM sorkara Minister, Minister tlukpui leh VIP thenkhat te Bungalow leh Quarters-a chengin an chenna tur thuam thain mipui sum hmangin nasa takin an inchei a. He'ng bakah hian Bungalow emaw Quarters pawha cheng miah lo - Pu K. Sapdanga (cheng nuai 12), Pu Vanlalhlana (cheng nuai 12), Pu Lalthansanga (cheng nuai 12), Pu Vanlalthlana (cheng nuai 12) leh PC Vanlalruata (cheng nuai 12), Pu F. Rodingliana (cheng nuai 10), Pu B. Lalchhanzova (cheng nuai 10), Prof. Lalnilawma (cheng nuai 10) leh Pu Lalnghinglova Hmar (cheng nuai 10), Adviser to CM H. Ginzalala (cheng nuai 10) te mimal in chei nan Mizoram mipui sum cheng nuai 110 teh meuh hmanral a ni bawk.

"ZPM Chief Minister chuan Car pakhat bak a mamawh ve dawn lo, ZPM Minister chuan car pakhat bak a mamawh ve dawn lo, miin an tih theih chu eng nge kan tih theih loh ang? Chief Minister, Minister leh MLA te a hmahruaitu an ni ang a tih chu mipui bumna; Lal chak leh Lal duh luat avanga mipui Vote an dilna mangkhawng mai a ni.

_________________________

_Issued by Mizoram Pradesh Youth Congress Committee, at Aizawl Press Club. 10th September 2024._

DR. LORRAIN LALPEKLIANA CHINZAH MLA LEH ADVISER TO CHIEF MINISTER NIBAWK IN NAUPANG MAMAWH BIK NEITE TAN AIDS & APPLIANCES SEMCHHUAK

Lawngtlai the 11th September, 2024 : Vawiin Chawhma dar 11 khan Samagra Shiksha, Lawngtlai District bultumin Naupang mamawh bik nei (Children with Special Needs) te tana anmahni puitu tur 'Aids & Appliances'  semchhuahna chu DC Conference Hall- ah neih a ni a. Dr. Lorrain Lalpekliana Chinzah, Adviser to Chief Minister leh Lawngtlai East bialtu MLA nibawk chuan he hun hi hmanpuiin, Aids & Appliances hi a  semchhuak.

Dr. Lorrain Lalpekliana Chinzah chuan naupang mamawh bik nei, nu leh pa, zirtirtu leh hun hmang tura lo kalte hnena lawmthu sawina a nei hmasa a. Vohbik (Children with Special Needs) te hi sawrkarin a ngai pawimawh hle tih sawiin, zirna In an rah theihna tur, an harsatna sukiang tur leh an dikna chanvo te humhalh turin theihtawpin hna a thawk thin a; kum tinin sum leh pai tam tak a seng thin a ni, a ti. 'Vohbik' te dinhmun hrechianga zir thiamna nei tura Samagra Shiksha, Lawngtlai District - te hmalakna chu fakawm a tih thu tarlangin, hemi baka Lawngtlai district chhunga zirna In ten  hmasawnna rahbi thar a kai theihna tura Civil works leh thil dang hrang hrang a an hmlakna chu mipuiten an hre reng a ni,  a ti.

' Vohbik' te  chu mi bik tak an nih thu tarlangin,  Khuallian chuan taima leh tum ruh taka school kal thin tur leh vawiina an dawng tak anmahni puihtu tur hmanrua chi hrang hrangte chu tangkai taka hmang turin a chah a. Nakin lawka hna tha leh duhawm  tak thawk thei turin theihtawpa bei turin a fuih a. Khawvela Scientist ropui tak zinga mi 'Stephen Hawking' ngei pawh 'wheelchair' a nawr ngai a nih thu tarlangin, Khuallian chuan Vohbikte chu  rilru tikhauh tur leh beiseina nena an zirlaite an zir  chuan mi ropui tak an ni ve thei dawn tiin a fuih.

Dr. Lorrain Lalpekliana Chinzah chuan Zirtirtute pawimawhna sawiin, Vohbik naupangte an enkawl kawngah fimkhur a ngai hle a ti a. An rilru put hmang hre tur leh tha taka enkawl thei turin Zirtirtute chu mahni inchhiar zau turin a chah a. Vohbik an nihna hriattir lutuk zawnga kalpui chu thil tha nilo a a hriat thu sawiin, naupang dangte nen angkhat renga enkawl a tul rualin, a bik taka enkawl an ngaihna lai leh tanpui an ngaihnate hriatthiam pui erawh a tul hle a ti. Nu leh pa te zingah Vohbik enkawl lai neite dinhmun a hriatthiampui tih tarlangin, an fate enkawl kawngah mahni chauha thawk mai lova, hetiang lama thiamna bik neite rawn thin turin a ngen a. Vohbik an enkawl kawngah phurrita la lo tur leh an tan sawrkar a awm reng tih hre tura a duh thu tarlangin;  nu leh pa, zirtirtu leh sawrkarten theihtawp an chhuah chuan Vohbikte tana khawvel nuam tak siam a nih ngei  a beisei thu a sawi.

Dr. Lorrain Lalpekpiana Chinzah chuan LIKBK Assembly Media Ministry-te'n Vohbikte puala an siam 'Music Video' tlangzarhna neiin,  Naupang mamawh bik neite tan  Wheelchair -11, Crutch - 2, Tarmit - 90, Beng dar -1 leh Knee guard - 2  a sem chhuak nghal a ni.

Pi Elizabeth VL. Chhuangi (IE Samagra Shiksha, Lawngtlai) chuan report tawi pekna neiin,  Samagra Shiksha, Lawngtlai chuan Lawngtlai district chhunga Block - 4,  ah Children with Special Needs (CWSN) zawn chhuah hna kal pui thin niin, Naupang mamawh bik neite enkawl thiam turin  Zirtirtute hnenah 'training'  pawh pek thin a ni, a  ti a. Vohbik naupangte zinga 'talent'  haichhuah kawngah Samagra Shiksha chuan theihtawp chhuahin, tanpui  ngaizualte  leh mi bik hnenah 'stipend' pek thin a  nih thu a tarlang bawk.

Vawiin Naupang mamawh bik nei (Children with Special Needs) te tana anmahni puitu tur 'Aids & Appliances'  semchhuah inkhawm hi Pu H. Laltanpuia, Addl. DPC, Samagra Shiksha, Lawngtlai chuan kaihruaiin, Pu Lalchhanhima Chhangte, DPC chuan kalkhawmte lawmna thu a sawi a. Pu Alex Lalzawmpuia, Dy. DPC,  Samagra Shiksha, Lawngtlai chuan lawmthu sawina neiin hun a khar.

 MDC FUND HMANGA HNATHAWH KHAWTLANG KUTAH H

Rauthla 11.09.2024 : Pu LR. Dingliana Chinzah, Lawngtlai AOC bialtu MDC chuan tukin khan MDC fund aṭanga Thingkah khuaa Waiting Shed a sak chu, Thingkah khawtlang hruaitute kutah a hlan.

Waiting Shed hawnna leh khawtlang kuta hlanna inkhawm tawi neihah hian Lawngtlai AOC bialtu MDC chuan thusawiin, Waiting Shed chu chawlh hahdam nan leh a ṭulna apianga khawtlangin an hman tangkai tura ruahman a nih thu a sawi a. Thingkah khawtlang mipuite ta a nih angin, a chhiat ṭhat leh a enkawlna chungchangah a mawhphurtu chu Thingkah khawtlang mipuite an ni, a ti a. MDC fund chu bial chhung khaw 3-ah sem rual a ṭul thin avangin, a ṭul dan leh remchan dan ang zelin ; a lang leh langlo lamah rualkhai thei ang berin bial mipuite tan sem rual thin a ni, a ti a. Bial hmasawnna turin MDC fund chu tangkai taka hman chhunzawm zel tum a ni, a ti bawk.

Pu Vanlalenga Fanai, President Thingkah Branch YLA kaihhruai he hun hmanna ah hian Pu A. Lalsangvela, VCP Thingkah hnen aṭangin khawtlang aiawha lawmthu sawina ngaihthlak a ni a. Waiting Shed sak nan bialtu MDC fund atangin Rs. 100,720 /- hman ral a nih thu ngaihthlak zui ni bawkin, a sak hna leh buaipui hna chu YLA Thingkah Branch te'n an buaipui a, Waiting Shed hi tunlai hmanraw ṭha ber ber leh tlo tur ang bera sak niin, Electric Current pawh luh nghal a ni bawk.

Lawngtlai AOC bialtu MDC Pu LR. Dingliana Chinzah, Adviser ZPM Lai District Headquarters Lawngtlai hi Samuel Laldawngliana Chinzah, General Secretary, ZPM Lai Dist Hqtrs Lawngtlai leh, R. Lalruatkima i/c YouTube, Media, IT & Publicity Dept te'n District Headquarters aiawhin an tawiawm a. Pu K. Lalbiakmuana, Adviser, ZPM Lai Dist. Hqtrs, Pu Lallianzawna President ZPM AOC Veng Unit leh khawtlang hruaitute te hun hmanna ah hian an tel a ni.

Rauthla 11.09.2024 : Samagra Shiksha hnuaia thawkte chuan thla thum chhung hlawh an la la lo a, nimin khan thla thum chhung hlawh pe tura sorkar hun tiam an pek a tawp. Samagra Shiksha hnuaia thawkte hian thla thum chhung hlawh an lak tawh loh avangin an inzawm khawmna Federation of Mizoram Samagra Shiksha Employees (FEMSE) hmalaknain September 5, Teachers Day khan lungawi lohna lantir an tum a, Education Minister leh Adviser to Chief Minister (Finance)- te ngenna avangin an thulh a ni.

September 4, 2024 khan FEMSE hian thuchhuah siamin, "Sorkarin thla thum hlawh min siamsak mek thu min hriattir avang leh central atanga sum lo thleng mai tur min hriattir avangtein tun dinhmunah sorkar hotute min ngenna chu zawm phawt a, badge dum bel rih loh mai ni se tia rel a ni," an ti a; hun an pek chhunga an ngenna tihhlawhtlin a nih loh chuan na zawka sorkar nawr an tum thu an tarlang.

FEMSE chuan, September 4, 2024 atanga chhiara chawlhkar khat chhungin thla thum chhung hlawh pe tura thlen ni se, min pe thei lo a nih chuan FEMSE Council-in na zawka kal dan tur an rêl ang, tiin ro an rel a ni.

September 4 atanga chhiara chawlhkar khat chu nimin khan a tawp a, an hlawh chungchangah sorkar atangin thu dawn an la nei lo a ni.

Kum 11 chhungin mahni intihlum mi 948: 2024 thla 7 chhungin mi 49 intihlum tawh

Rauthla 10.09.2024 : Mizoram sorkarin kum 11 kal ta chhunga Mizorama mahni intihlum a chhinchhiah zat chu mi 948 an ni a, chu'ng zinga 83.76% chu mipa an ni. Kumin 2024-ah July thla tawp thleng khan mi 49 an intihlum tawh. Vawiin September 10 hi World Suicide Prevention Day a ni.

Mizoram Police-a CID (Crime)-in an chhinchhiah danin, kum 11 chhung, 2014 aṭanga kumin 2024 July 31 thleng khan Mizoramah mi 948 an intihlum tawh a; chu'ng zinga 794 chu mipa niin, intihlum zawng zawng aṭangin 83.76% a tling a, mi 154 chu hmeichhia niin, intihlum zat aṭangin 16.24% an ni.

Kum 2014 hnu lama mahni intihlum tam ber kum chu 2022 kha niin, mi 125 (mipa 104 leh hmeichhia 21) an intihlum a; kum 2014 leh 2015-ah khan mi 100 chuang intihlum awmin, kum dang zawngah chuan 100 an tling lo thung.

Kumin 2024 bikah mi 49 an intihlum tawh a, chu'ng zinga mi 41 (83.67%) chu mipa an ni a, mi pasarih (16.33%) chu hmeichhia an ni.

Mahni intihlumte intihlum dan ber chu inawh (hanging) a ni a, kum 11 kal ta chhunga mahni intihlum mi 948 zinga 903 (95.25%) chu inâwk hlum an ni. Mahni inkâp mi 16, zuang thla mi pasarih, invit pathum, bomb hmang pahnih, electric hmang pakhat, inhâl, túr ei/in, etc. mi 16 an awm bawk.

Vawiin September 10 hi World Suicide Prevention Day (mahni intihhlum venna ni) a ni a, kumina thupui chu 'Changing the narrative on suicide' tih a ni. World Health Organization (WHO), World Federation for Mental Health leh International Association for Suicide Prevention-te ruahman angin World Suicide Prevention Day hi kum 2003 khan hman ṭan a ni.

 Dated Hnahthial, the 10th September, 2024:

NOTIFICATION

National Highway (NH)-54/02, Hnahthial khaw dai, Sericulture farm bula kawng tlahniam chu road construction company ten National Highway (NH)-54/02 leh By-pass road hi lirthei tan tlan theih a an siam that tawh avangin, Govt. of Mizoram Notification No. 12021/10/2004/TRF, Dt.27.5.2020 Ieh MV Act Sec- 115 hmanga lirthei tlan dan tur chungchanga ruahmanna siam thei tura thuneihna pek anih angin, Hnahthial SP, Pu Shivendu Bhushan, IPS chuan thu leh awm hma chu a hnuai ami ang hian lirthei tlan dan tur chungchangah thupek a chhuah.

1. LMV (Car, Gypsy, Sumo, Bolero, Pik up, etc.) leh 2 wheelers te chu National Highway (NH)-54/02 ah hian eng hawi zawng pawhin an tlan thei tawh ang.

2. MMV leh HMV (407 Truck chin leh a aia lian) te erawh NH-54/02 ah hian tun dinhmunah tlan phal ala ni rih lo.

3. MMV leh HMV (407 Truck chin leh a aia lian) chin te chu by-pass road lamah kal tur a ni.

4. HMV Truck ke sawm pahnih (12) emaw a ai tam nei chin chu NH-54/02/By-pass road-ah hian thu leh awm hma chu tlan phal a ni lo. Tin heng lirtheite hi Serchhip to Lunglei via Thenzawi lamah kal turin kan inhriattir a ni.

He thupek hian he office notification No.SP (HNTL)/A-72/2024/517, Dt.30th August 2024 chu a luahlan ang. Tin, he thupek hian Magistrate/Police/F&ES leh medical emergency duty lirthei chevel te a huam lovang.

He thupek zawm lo te chu MV Act Section-179 hmangin an chungah action lak a ni ang.

 Pi C.Lalchhandami (Damtei) chuan MSCW Chairperson anihna atangin banna a thehlut

Rauthla 09.09.2024 : Mizoram State Commission for Women Chairperson Pi Lalchhandami chuan inrinni khan MSCW Chairperson a nihna atangin banna a thehlut.

Pi Lalchhandami hian Social Welfare, Tribal Affairs, Women & Child Development Department Secretary hnenah banna hi a thehlut a, ZPM Party hruaitute nen an inrawn hnuah Party inchirhtheihna boruak tha lo tak awm zui tur chu tha lo an tih avang leh Women Commission zahawmna vawn him zel anih theih nan Chairperson dinhmun atangin banna a thehlut tih a sawi.

Banna lehkha-a a ziah danin Pi Lalchhandami chuan a pian kum chungchangah eptu Political Party lam atanga beihna nasa tak a tawk a ni, a ti a. Kum 65 theng chelh theih anih avangin a kum dik tak ang chuan la thawk chhunzawm zel thei tur chu ani tih sawiin beihna a tawh nasat em avangin phur taka hnathawh zui a harsa tih sawiin ban mai chu tha zawka a hriat thu a sawi.

Pi Lalchhandami chuan a lehkha ah hian Govt notification No.B.12011/11/2013-SWD Dt 8th March, 2024 hmangin Mizoram State Commission for Women Chairperson atana ruat a ni thu te, a mawhphurhna chu theihtawp chhuaha a chelh zui thu te a tarlang a. A hna chhung thla nga (5 months) chhung a case hearing 102 lai nei in, a hlawhtlinna 80%  hmuh a nih thu a tarlang bawk.

Pi Lalchhandami chuan, ka awm hma kum 2019 May atanga February 2024 (kum 5 chhung) thleng hian case hearing an lo neih zat chu 86 cases a ni a. Chutiang atanga thlir chuan ‘ka chairperson’ chhung hian hmasawnna nasa tak kan hmu thei a ni, tiin a lehkha ah hian a tarlan a, tun ZPM party thil tum zinga pawimawh ber a ngaih ‘Ram rorelna a Pathian tundin’ tih pawh hi Mizoram State Commission for Women hnathawh hi tunah rih chuan, a thawh hlawk ber te zing a mi a nih ngei a rinthu a lekha ah hian a tarlang a ni.

 Tipi Ferry Marboat Service rate

Nimin (06.09.2024) atang khan Siaha leh Lawngtlai District te in kalpawhna awlsam zawk a awm theihna turin Dr.K.Beichhua Siaha Bialtu MLA chuan a Fund atangin Marboat siam tirin a service tan ta a. Marboat hi Thawhtan (Monday) - Inrinni (Saturday) inkar ah zing dar 6:00 Am - 5:00 pm chhung hian a service thin dawn a. Marboat ah hian 407, 909, Ashok Leyland etc te a phur thei dawn lo ang. Hetiang hian lirthei Kai thei te leh a rate te ruahman ani.

(Photo : Tuipui D - Marboat)

1. Sumo - Rs 200

2. Bolero - Rs 200

3. Car (All types) - Rs 200

4. Pick up - Rs 200

5. TATA ACE - Rs 200

6. Two Wheelers - Rs 100

7. Auto Rickshaw - Rs 100