September 23, 2024 (Rauthla) : Vawiin khan YLA Sangau Sub-Hqrs. buatsaihin Sangau-III Community Hall-ah YLA Golden Jubilee lawmna hun hman a ni a, he hun hi LADC a Leader of Opposition Pu K. Hre Kung, MDC chuan khuallian niin hun a hmanpui.
Leader of Opposition chuan "YLA hian kum 50 a lo tling ta a, tun atangin kum 100 kawng kan zawh tan dawn a ni. Chutah chuan Lairam leh hnam hi dah hmasa ber ila ; kan rilru, kan ngaihtuahna leh kan theihna zawng zawng nen Lairam leh hnam tan hma lam i pan ang u" a ti a. YLA in kum 50 a tlin theih nan kan mi hmasate'n kawng chhuk chho leh kawng harsa tam tak an lo zawh tawh a, he an inpekna ropuina tak avanga vawiin ni leh tun dinhmun YLA min thlen puitute an ni a, fak leh chawimawi an phu takzet a ni, vawiin Golden Jubilee a lo thlen hian kan hre reng a, zahna chibai kan buk a ni, a ti bawk.
Sangau West bialtu MDC ni bawk Pu K. Hre Kung chuan, 'Young Lai Association member kan nihna ang tak a Lairam leh hnam tan dingnghet tlat tur leh kan Lai tawng, Lai thuam leh Lai hnam nunphung leh ziarang te chu humhalh a, vawng nungtu nih theuh i tum ang u' tiin YLA member kalkhawmte chu a chah a ; "Vawiin hun hi hlim leh lawm takin hmang theuh ila, kan hma lam hun lo kal zel turah he Jubilee hian thawhhona tha, inlungrualna leh Lairam leh hnam tan hmasawnna thlen sela, Lairam leh hnam tan theihtawp chhuah theuh turin YLA member zawng zawng te ka sawm che u a ni" a ti bawk a ni.
He hun hmanna ah hian Zai leh lama intihsiakna hun neih niin, zaithiam tak tak zai ngaihthlak a ni a. Pu H. Thangchemsanga ex-MDC & Adviser ZPM Lai Dist Hqtrs, Pu H. Lallawmzuala Secretary, ZPM Lai Dist Hqtrs leh Tv. R. Lalnunchama GS ZPM Lai Dist. Hqtrs Thalai te bakah, Sangau Sub-Headquarters YLA hruaitute, Sangau area-a Branch YLA hrang hrang hruaitute, Sangau area VCs leh Jt. VC hruaitute leh YLA member ṭhahnem tak he hun hmanna ah hian an tel a, Miss Mizoram 2017 Rody H. Vanlalhriatpuii leh a pasal C. Lalruatkima Addl. SP, Siaha te pawhin he hun hi an hmanpui bawk.
Post a Comment