September 22, 2024 (Rauthla) : Pu C. Lalmuanthanga, CEM LADC chuan tlang hrang hranga YLA Member, September 23, 2024 YLA Day leh YLA Golden Jubilee pualin duhsakna chibai a buk.
Pu C. Lalmuanthanga, CEM LADC chuan YLA Golden Jubilee thlenna tur sulsutu leh mi hmasat, mual liamtate an hriat reng thu sawiin, YLA dintu zinga a mi Pu F. Lalhulha'n Pathian kaihhruaina changa min la dam pui chu hlu a tih thu sawiin, a tharin zahna chibai a buk.
YLA in kan ram leh hnam, khawtlang tana a thawhna kawng tinrengah zah a phu leh chawimawi an phu tih sawiin, CEM chuan 'kan hnam ziarang humhalh kawngah te, Ruihhlo do kawnga a hmalakna te, Zirna lam leh mihring nunphung inkaihhruaina lama a thawhnate hi a ropui hlein ka hria a' a ti a. Kan Lairam leh Hnam tana an hnathawhna kawng tinrengah thlawp tlat zelin, Lairam mipuite hian i finchhuahin i thawhpui zel ang u, a ti.
Pu C. Lalmuanthanga, CEM LADC chuan he hun ropui, YLA Golden Jubilee lo thlengah hian kan thuvawn, YLA innghahna laimu hrerengin Inlungrualna kawngah te, mi chanhai (mi harsa zawk te) chhawmdawlna kawngah te, thawhhona kawngahte leh tlawmngaihna kawngah te, inpekna thar nena he Golden Jubilee hun ropui leh ni chhinchhiahtlak hi hlim taka hmang theuh turin duhsakna sang ber ka hlan a che u, a ti bawk.
Post a Comment