Mizoram CM Nih AA Nan Tei Lai Lo Ti Cu Zolangh Le Neekbia A Si

 Mizoram CM Nih AA Nan Tei Lai Lo Ti Cu Zolangh Le Neekbia A Si

Rauthla 13.09.2024 : Chinland Defence Force Thantlang, Zahnak Battalion Vice Chairman, Pu Lalawmpui nih, Pu Lalduhoma hi ka theih tawk ah ka uar ngaimi pa a si. Mizoram sersiamnak ah sasuhthah tampi a ngei. Ramkhel lei in caansau a bawhmi a si i, Mizoram sernak caan a ngeih ve tik ah a chimmi ka uar ngaimi an um. A hlei in Chinmi Chinlungchuak unau i funtom te hna kong hi ka uar ngai. Indiana i a chimmi pawl kha a tha lo ka ti lo. A dang cu ka uar ngai. Asinain ka chungah a luh khawh bak lo mi ka ei khawh bak lo mi biafang an um. Cucu AA kong kha a si.

General Tun Myat Naing nih Media dang ah a chim tawnmi cu Chinmi le CNA/F zolangh pah amte in bia a chim. Tun Myat Naing nih hi tluk in mithmuh bak in ningzak le zolangh in an kan tuah. A bia am te in hriamnam ngei lo le ralkap thazaang ngei lo cu Min Aung Hlaing zong nih a nek hna. Chinmi le CNA/F zong a bia am in an kan ti.

Cu bantuk biaam te cu Pu Lalduhoma nih AA cu an thawngtuk, nan tei hna lai lo timi biafang hi ruahnak pek ah ka chia lo. Cu nak cun Chinmi Chinlungchuak unau hmunkhat ah i funtom in hmunkhat ah um usih ti vial hi a ca ah a za. Kan tei lai ti ruangah dohmi a si lo. Duhthimnak dang a um lo caah doh hau dirhmun in kan um. Nan tei lai lo ti cu zolangh, minek a si.

Pu Lalduhoma bia hi Chinmi nih amah huatnak ah hmang hlah usih. Unau i huat phung a si lo. Pu Lalduhoma nih cun amah lei hoih cun a chim awk a si ko. Chinlungchuak Chinmi i funtomnak rian awt bantukin amah caah lam i vah caan a si. Kum 20, kum 30 hrawng hi dirhmun hi a hngah caah Mizoram sersiamnak caah Kaladan Projec cu a caah cun kannnih nih Min Aung Hlaing tei hngah bantukin hngahmi a si ko. Amah lam sialnak caah cun Centre India cozah phunglonh in bia a chim awk a si lo, ri lonh in a chim awk zong a si lo.

Paletwa cu Arakan Army nih khuaingal tlak in an tlak, vom nam in an mam, an i sahhrah, AA nih kan ram an i sahhrah mi hi namte in a ngah lai lo. Biahel phun in ti a ngah lo. Hlan in bia an i virh cang. A chim tualmal, a tuah tualmal, kan inn kan lo, kan thisen nih a tuar lio ah Pu Lalduhoma nih i rem u ti cu, kan inn kan lo kan thisen nih a tuarmi cu maw raldoh kan duh lo tiah kan ruah lai, kan caah a si kho in a ruat hnga maw?

Chinmi nih rem kan duh, daih kan duh ti'n raldoh ngol usilaw ram dawt siloin ralchiat i phetchem ah ka ruah. Ramkhel mit zong in, miphun mit zong in, biaknak mit zong in kan palh, kan i chuah sual lai ti a ruatmi kan um cun hi dohthlennak rian in i din u.

Kan ralkap kan mino thisen dorkhat zong a lak a si awk a si lo. Kirtak usilaw ziah nan kan kirtak tiah thisen nih auhthan mi miphun si ka duh lo. Teipek teilo pek ah kan rian a si. Al awk tha lo mi, pumpak , a bu, miphun in al awk tha lo mi a si. Kan tei lai tiah minthut a si lo. An tamtuk an thawngtuk ti ruang ah a kirmi miphun kan si lo, tiah 2024 Zing 11 ah GTRO i a chimmi kha a tawinak in laak mi a si.