September 23, 2024 (Rauthla) : Mexico-a Miss Universe thlanna neih tura India aiawh tur zawnna Miss India Universe chu nizan khan Zee Studio, Jaipur-ah neih zawh a ni a, India aiawh tur hian Gujarat nula Rhea Singha chu thlan a ni.
Miss Universe thlanna hi November 16, 2024 ah neih a ni dawn a, ram hrang hrang atangin nula hmeltha, piannalh leh fing thahnem tak an fuankhawm leh dawn. India aiawh tur thlanna hi September 9-22, 2024 chhung khan neih a ni a, he inelnaah hian Mizo nula Melissa Roneihpuii Hnialum pawh telin, Miss Popular atan thlan a ni a, Top 20 ah a inhlangkai bawk. Miss India Universe inelnaah hian India state 31 atangin nula 51 an inlan.
Miss Universe inelnaah India aiawh tur Rhea Singha hi Ahmedabad ah piangin, Model a ni a. Kum 18 a nih kum, kum 2023 khan Miss Teen Earth atan thlan a ni a, he inelna hi Madrid, Spain ah neih a ni a, Rhea Singha hian India ai a awh a ni.
Rhea Singha chuan Miss India Universe ni tur hian rim takin ka bei a, he dinhmun lo luah tawhtu ten phurna nasa tak min pe bawk a ni, a ti.
Miss lukhum khum tirtu leh kum 2025 Miss India Universe leh Judge ni bawk Urvashi Rautela chuan India chuan Miss Universe lukhum a khum ngei tur thu a sawi bawk.
Post a Comment