LAWNGTLAI BAWRHSAP IN INTENSIFIED IEC CAMPAIGN -INDIA FIGHT AGAINST HIV/AIDS & STI KHARNA HUN HMANPUI
Rauthla 13.09.2024 : Mizoram AIDS Control Society (MSACS) leh Lawngtlai District AIDS Prevention Control Committee (DAPCC) tangkawp buatsaih ni thum awh 'Intensified IEC Campaign - India Fight Against HIV/AIDS & STI' kharna inkhawm chu vawiin dar 11:30 khan Government Lawngtlai College Hall-ah neih a ni a. Pu Cheemala Siva Gopal Reddy, IAS, District bawrhsap leh Chairman, Lawngtlai District AIDS Prevention Control Committee (DAPCC) nibawk chuan khuallian niin a hmanpui.
Pu Cheemala Siva Gopal Reddy, IAS, chuan zirlai naupang, zirtirtu leh sawmbik lo kalkhawmte hnenah lawmthu sawina a nei hmasa a. HIV/AIDS leh Sexualy Transmitted Infections (STI) tirem tura nithum chhung zet beihpui thlak chuan Lawngtlai mipuite rilru suk thlek a tih danglam ngei a bei tlat tih sawiin, rah tha a chhuah ngei dawn a ni, a ti. Mipuiten HIV/AIDS leh STI - do beihpui thlak a nih chhan kan inzawh nawn fo a tul hle a, heng natna kaihtheih dan leh inven dan hrang hrangte chu rilrua hriatah duhtawk mai lova a taka nunpuitu ni theuh turin a fuih.
Bawrhsap chuan Mizoram chu HIV/AIDS leh Cancer hmunpui ti a hriat a ni thin chu pawi a tih thu sawiin, mitinin theihtawp chhuah a hun tak zet a ni, a ti. Mizoram chu India rama lehkha thiam tamna hmun, khawtlang nuam leh ralmuang tak ni mahsela, chhung lamah a damlo tak zet a, kan chhunglam natna hi kan pawm thiam phawt loh chuan hmalak a har dawn hle a ti. Pu Cheemala Siva Gopal Reddy chuan kan damlohna laite hi hre reng ila, a tihdam kawngah tumah inthlahdah lo in, theihtawpin thawk ho ang u tiin kalkhawte a fuih a. 'Tihdam aiin inven a tha zawk' tih chu mitin hriat a nih thu tarlangin bawrhsap chuan a taka nunpui tur leh HIV/AIDS kai theihna kawng hrang hrang laka fihlim turin kalkhawmte leh Lawngtlai mipuite a sawm.
Pu Cheemala Siva Gopal Reddy, IAS chuan Mizoram chhung a bik takin Lawngtlaiah ngei pawh ruihhlo a hluar hle tih tarlangin, thalai tam takte nunna hlu tak chan a ni thin chu thil pawi tak a ni, a ti a. Ruihhlo do na kawngah Sawrkar, NGO, Kohhran leh mipuite tan ho a tul hle a ti. HIV hrik veite endawng mai lo a, tanpui an ngaih kawngah theihtawp chhuah a tanpui turin a sawm a. HIV/ AIDS veite tan ART treatment- tha tak a awm tawh tih tarlangin, HIV kaite chuan he treatment hi la thin ngei ngei turin a chah a. Lawngtlai khawpui a lo thianghlim zawk nan leh HIV/AIDS leh Sexually Transmitted Infections ( STI) awm lohna district- a siam turin kalkhawmte leh Lawngtlai mipui zawng zawngte a sawm nghal bawk.
Post a Comment