September 9, 2024 (Rauthla) : Lawngtlai East MLA, Dr. Lorrain Lalpekliana Chinzah, Adviser to Chief Minister (H&FW & Agri.) chuan Lawngtlai District in kan mamawh em em CT Scan chu District Hospital Lawngtlaiah dah tura hmalakna kal pui mek a ni tih a sawi a, a dahna hmun tur pawh tun aṭanga reilo te ah buaipui a ni dawn a, hriselna kawnga hma kan sawn theihna turin sawrkarin theihtawp chhuahin hma a lak mek tih a sawi.
Vawiina ZPM Office Lawngtlaia ZPM chhung inkhawm hmanpuitu Dr. Lorrain Lalpekliana Chinzah chuan Lawngtlai District chhunga power supply ṭhalo lutuk chu sawrkarin a ngaihpawimawh thu sawiin, P&E Minister leh Department lama mi thiamte pawhin an buaipui mek thu a sawi a. Hriselna kawnga Lawngtlai District-in hma a sawn zel theihna turin PHC, CHC leh HWO te thuam chak tura hmalak mek a nih thu a sawi bawk a, Mizoram Sawrkar chuan District Jail engemaw zat sak ṭhat tumin hma a la mek a, Lawngtlai District Jail pawh sak ṭhat tur zingah a tel ve ngei a beisei thu a sawi bawk.
Pu N. Zangura, MDC pawhin thusawiin, LADC kaihruai mektu Congress leh MNF thawkdun sawrkar lakah mipuite'n beiseina an neih loh thu a sawi a. MNF chu an innghahna thupui 'Pathian leh kan ram tan' tih phuahtu meuh pawhin awm rengna tlakah a ngaih tawhloh avangin a chhuahsan hial tawh a ni, a ti a. 'MNF MDC te chu Lal leh thuneih chaka tuihal an nih avangin, an huat em em thin Congress MDC 1 lek pawh CEM tirin, LADC ah ro an rel mek a ni' a ti bawk a, Congress chu an bu pui ber central aṭang an tlak chhiat tawh avangin, khin tham leh beih tlak an awm tawhlo a ti a. Nakum MDC inthlan lo awm turah ZPM chu mipuite beisei awm chhun kan ni tawh a ni, a ti.
He hunah hian Pu H. Liantluanga, President MUP Lawngtlai Branch chuan ZPM zawm tharin, Lawngtlai East MLA chuan party ah a lawmlut a. Chhung Inkhawm Programme hi Pu B. Lalrinsanga, Vice President chuan kaihruaiin, Pu B. Lianngaia Adviser chuan hunserh a hmang a. MLA, MDC, ZPM Lai District Headquarters Lawngtlai hruaitute leh party mi thahnem tak an kalkhawm a ni.
Post a Comment