Rauthla 06.09.2024 : Vawiin Ni September 6,2024 hian District Institute of Education and Training, Lawngtlai ten DIET Lawngtlai Multipurpose Hall ah Graduation Day 2024 neiin Lai Autonomous District Council a Chief Executive Member Pu C.Lalmuanthanga chu khuallian niin hun a hman pui
Khuallian Pu C.Lalmuanthanga chuan, Lawngtlai District hi Literacy percentage ah a hniam ber pawl kan ni a. Chuti chung chung chuan DIET Lawngtlai ten result tha tak tak in nei thin hi a lawmawm hle a. Zirtirtute leh zirlaite in thawk rim tih hai rual a ni lova. Kan awmna in a zir loh avangin harsatna tam tak kan tawk pawh a ni htei, zirlaibu kan neih loh avanga harsatna tawk thei kan nih mek laiin, Internet hmasawnna hi tangkai taka kan hman thiam erawh a tul hle dawn a ni, a ti a. Kan zirlai kan ngaihpawimawh ang chiah hian kan khawsak ho na pawh hi ngaipawimawh a, thlak danglam thei turin tan ila ang u, tiin kalkhawm te a sawm a. Hmasawnna hi a tha zawnga kan hman loh chuan kan nih tur kan min nih tir lo tu a ni tih hi hria ila, tangkai taka hman thiam kan lo zir pawh a tul hle dawn a ni, a ti bawk.
Zirtirtu hna hi hna zahawm, thianghlim leh hna ropui tak a ni a. Inthlahdah leh zawmthaw taka thawh a rem lova. Eizawnna atan chauh zirtirtu hna hi hman tum kan awm anih chuan zirtirtu nih tum lo ngam ila. Kan eizawnna atan min pek hi kan rawngbawlna a ni tih hria a, mahni hnathawhna Pathian rawngbawlna pawn thei mi kan nih hi a ngai tawh tak zet a ni, a ti bawk.
Khuallian Pu C.Lalmuanthanga chuan, tuna LADC sorkar hian zirtirtu hna pawh a la leh dawn a. Duhsakna aiin thiamna a pawimawh dawn tih hria ila. Thiamna aia duhsakna avang tling tum kan awm anih erawh chuan dil loh ngam tur a ni, a ti a. Hun hmasa lamah political appointment angin zirtirtu hna in pek hi an lo kalpui tawh pawh a ni thei e. Tunah chuan Recruitment Rules tha tak kan nei tawh a, kan phak tawk a fair leh tha thei ang ber zirtirtu hna hi lak zel kan tum a ni, a ti a. Kan ram leh hnam hi zirna kawngah kan hnufual hle tawh avangin, DIET atang zirlai chhuak te hian theihtawp chhuah ula. Hna in lo hmu anih pawhin taimakna leh rinawmna nen mahni hna theuh thawk zel turin kan duh che u a ni, tiin zirlai kal chhuak turte a chah a. Amah kan rinchhan chunga kan beih hram hram chuan hlawhchham hi a phal lo tih hria ila, mahni thawhchhuah ring a, intodelh kan ngai anih pawhin thawh hreh nei lo zirlai/ zirtirtu nih i tum zel ang u, tiin kalkhawm te hnenah hian thuchah a sawi a ni.
Vawiin DIET Trainees Graduation Day ah hian Pi Ngunhmingliani Chinzah, Principa in thusawina a nei bawk a. Rev Father Nelson Joseph, Rector & Principal Catholic Chuech, Lawngtlai in hunserh hmangin, Pi F.Lalnunsiami, Principal ANM, Pu Elvis Lalthangzuala President MJA Lawngtlai, Thingkah Middle School leh Primary School Headmaster ten he hun hi an hmanpui a ni.
DIET Lawngtlai Class 2022-24 ah hian zirlai 45 exam in zirlai 43 ten hlawhtlinna an chang a ni.
Post a Comment