Pu C. Lalmuanthanga, CEM LADC leh LSA hruaitute an inkawm
_Zirna siamthatna kawngah leh zirlai enkawlna kawngah thawhhona tha kan neih zel ka beisei - CEM_
August 14, 2024 (Rauthla) : Lai Autonomous District Council-a CEM Pu C. Lalmuanthanga leh Lai Students' Association, Gen. Hqrs; Lawngtlai hruaitute chuan vawiin khan CEM Office-ah inkawmhona an nei a. Lai Students' Hostel chungchang te leh zirna lama hmasawnna awm theite an sawidun.
Pu C. Lalmuanthanga chuan tun hnaia ram leh hnam thil avanga a zinnaah Shillong leh Delhi-a Lai Students' Hostel a tlawh thu sawiin, an dinhmun, harsatna leh mamawhte a zir chian thunsawiin, lo enzui tura ruatte pawh an nei tih a sawi a. Report a dawn thuai a beisei thu sawi. CEM chuan Shillong-a Lai Students' Hostel hmun tur an buaipuina kawngah August 11, 2024 khan Khasi Hills ADC CEM Pu PN Shyem nen an inkawm tih a sawi a, dilna an thlen thu leh beiseina sang tak a neih thu a sawi a. Zirna siamathatna kawngah leh zirlai enkawlna kawngah thawhhona tha tak kan neih zel ka beisei, a ti.
LSA hruaitute chuan zirtirtu dinhmun, zirlai awm dan chungchangte, school thenkhata zirtirtu inrualkhai lo siamthat ngai an hriat te, zirtirtu thenkhat a nihna tur ang ni lova chhawr an awm thu an hriat thu te, felfai taka hnalak an duh thute CEM hnenah hian an thlen a. Siamthat tura an duhdan leh rawtnate an thlen bawk.
CEM chuan LSA hruaitu ten a hnena an thu thlente chu hmalak zui a tum thu leh zirna kawnga LADC in hma a lak dan te a lo hrilh a. Hma an lakna kawngah harsatna awm theite sawihoin zirna siamthatna kawngah hmalak ho puiah a sawm.
Post a Comment