August 27, 2024 (Rauthla) : Pu C. Lalmuanthanga, CEM, LADC chuan vawiin khan LADC-in tun aia tha zawk leh mumal zawka chhiah lakkhawm dan tur sawi ho turin, he lama mawhphurh tute Meeting a neihpui.
Pu C. Lalmuanthanga, CEM chuan LADC hnuaia Department-te chu an mawhphurna zawnah theuh an pawimawh vek thu sawiin, vawiina kalkhawmte chu ram leh hnam tan, hmasawnna tura sum leh pai thawhchhuahna kawnga mawhphurtu bik an nih thu a sawi a. Duty chungchangah mawhphurna sang tak nei an nih thu a sawi bawk.
CEM chuan, "Vawiin kan thutkhawmna chhan chu, engtin nge Local Revenue hi kan tihpun theih anga, sum kawngbo te awm palh thei a ni a, lo awm palh tase, engtin nge him zawk leh tha zawkin kan kal theih ang tih leh, kan sum thawhchhuahna kawngah engtin nge hma kan sawn theih anga, Online Payment gateway siam theih dan a awm ang em, engtin nge hma kan lak ang, tih kan ngaihtuah ho dawn a ni" a ti bawk.
Pu Sanghuliana Mualchin, Executive Member, Taxation Department changtu chuan tuna LADC Tax dinhmun leh hmabak a la neih te, hmasawnna tura tan lak a ngaihna lai leh rawtna a neihte report tlangpui a pe a, uluk taka sawihona hun hman a ni.
He hunah hian LADC Revenue dinhmun leh siamthat ngai laite, Tax hmuh belh theih dan tur kawngte, Tax ba awm thin chungchangte sawiho a ni a, heng sawihona leh rawtnate bawh zuitu tur, Revenue Resources Mobilization Committee din tha tih ani a, an ni hian ngun takin lo zir chiang se, nakum Budget Session-a pharh hman turin report lo buatsaih se tih a ni bawk.
He Meeting-ah hian Pu Sanghuliana Mualchin, Executive Member, Pu Lalropuia Chinzah, Executive Member. Pu K. Lalthanzara, Executive Secretary LADC bakah, Officer pawimawh tak tak an tel bawk.
Post a Comment