July 31, 2024, Rauthla : Vawiin khan Lawngtlai District Students' Association (LDSA) hruaituten Education Minister Dr. Vanlalthlana chu a pisa ah hmuin, Lawngtlai District atanga High School Teacher pathum sawnchhuah chungchangah leh Kamalanagar Higher Secondary School a Lecturer indaihlohna chungchang bakah, Mualbu UPS building thli in a tihchhiat chungchanga hmalakna awm thei te an sawipui.
LDSA hruaitute chuan Education Minister hnenah hian tun hnaiah Lawngtlai District chhunga High School pathum, Govt. Ramthar High School, Lungpher South, Govt. High School, Pangkhua leh Govt. Lai High School, Vawmbuk atanga zirtirtu sawnchhuahte chu an aiawh dah an la nih loh thu leh, transfer te hi Mathematics Teacher te an nih avanga zirlai ten harsatna an tawh thu leh an aiawh dah tura ruahmanna awm thei te an sawipui a. Minister chuan naktuk August ni1 hian hemi chungchang bik sawi tura School Education Director nen an meeting tur thu sawiin, karleh chhung chuan an aiawh tur dah fel hman an nih a beisei thu zirlai pawl hruaitute hi a lo hrilh a ni.
LDSA hruaitute chuan hun rei tak ata tawh sorkara an lo thlen Kamalanagar Higher Secondary School a thawk tur, Economics leh Education subject Lecturer te chu dah an nih hun tur leh, ruahmanna awm tawh te Minister hi zawtin, an sawipui bawk a. Minister chuan ruahmanna siam vek a nih tawh thu leh, August first week-a Principal Council nen meeting an neih zawhah order chhuah nghal tur a nih thu te, joining report pawh order chhuah atanga ni 5 chhunga Lecturer ten an lo pek tur thu LDSA hruaitute hnenah hian a sawi bawk a ni.
LDSA hruaitute chuan Mualbu UPS School sakthat ngai chungchang pawh Education Minister hi sawipuiin, tunah Central-ah SPD chu Samagra atanga Shool sak thatna tura pawisa awm theite dila a thang mek thu Minister chuan sawiin, pawisa hmuh a nih veleh sak that tura zingah an telh tur thu a sawi a ni.
Education Minister hmuhnaah hian LDSA hruaitute hi MCSU Joint Hqtrs hruaitu ten an tawiawm a. LDSA chuan MCSU chungah thawhhona tha tak an neih avangin an lawmthu an sawi a, tin, Education Minister pawhin hun tha tak a siamsak avangin lawmthu an sawi bawk a ni. Dr. Vanlalthlana chu a hunah chuan politics rama buai ve lo, zirna ngai pawimawh mi tak nia an hmuh thu hmaichhanah an hrilh bawk.
Post a Comment