May 24, 2023 (Rauthla) : Vawiin khan LADC Conference Hall-ah lehkhabu pahnih tlangzarh niin, Biography of MRC/MDC tih chu Pu BN. Thangpuia, EM i/c Art & Culture Department, LADC in tlangzarhin, Laica Tial Ning le Laiholh Grammar Cheukhat tih lehkhabu chu Rev B. Zazawna Lai, General Secretary LIKBK chuan a tlangzarh bawk.
Pu BN.Thangpuia EM chuan LADC hian lehkhabu ziah kawngah hmasawn kan ngai hle a, tan kan lak a ngai hle, a ti a. Laifa ziarang leh hmasawnna tur hawi zawng lehkhabu siam kawngah tan kan lak a ngai zual, a ti a. Art & Culture Department, LADC EM Pu BN. Thangpuia chuan LADC in kumtin lehkhabu ziah nan Rs. 2 lakhs a dah thu leh hei hi a duh a piang ten Publication board, LADC, Art & Culture Department ah dil theih a nih thu a sawi bawk.
Rev. B. Zazawna Lai chuan Laica Tial Ning Le Laiholh Grammar Cheukhat tih lehkhabu tha tak leh Lehkhabu rotling leh hlu tak mai, tlangzarh thei a ka awm hi ka lawm hle a, a ziaktu Pu B. Hmun Cung Nung hi Kum upa lam tawh a ni a, hetiang lehkhabu tha tak mai a ziak thei hi a fakawmin a entawn tlak hle a ni. Laitawng zir duh leh mamawhte tan lehkhabu tangkai leh hlu tak a nih zel ka ring tlat a ni, a ti.
Biography of MRC/MDC LADC tih lehkhabu hi Pu T. Chawnthangpuia, Librarian LADC in thlirzauna a nei a, Laica Tial Ning le Laiholh Grammar Cheukhat tih lehkhabu hi Rev. Dr. Hla Aung, Former General Secretary CACC in thlirzauna a nei bawk.
Lehkhabu tlangzarh inkhawm hi Pu LH. Lalhmunmawia, Vice President ALL in kaihruaiin, Rev. V. Suikharliana chuan hunserh a hmang a, kalkhawmte atangin thusawi ngaihthlak a ni bawk.
Post a Comment