UKRAINE RALDOMITEN CHECHEN RALHRAT RUAL AN TUKZAL - Lawmkima Hmar

Tun tum chu Ukraine ram hruaitute that tura an tirhluh Chechen Army te chungchang tlem te chauh tarlang teh ang.

Russia-in a thenawm ram Ukraine a run meknaah Russia sipaite pui turin Russia hnuaia inrelbawlna hran nei Chechenya sipai ralhrat khawkheng 10,000 zet tirh luh an ni a. He hei khawvel ramdangte pawhin an huphurhpui hle a ni.

Heng Chechen sipaite hi Ukraine ram hruitute, an lal dan indawta that tura tirhluh niin an thah turte thlalak hi playing card ang deuhin mumal taka siamsak vek an ni. US chuan Irag-ah khan hetiang hian a lo ti tawh bawk.

Amaherawhchu Chechen Special Force te hian Kyiv khaw daifema inbeihnaah Ukraine sipai leh tualchher sipai (volunteer) te an ngam tlat lo! Ukraine lam hian Chechen convoy tank 56 zet an lo kahchhiatsak a, an hotupa ber kahhlum a ni bawk. Chechen sipai engzat chiahin nge nunna chan tih erawh finfiah theih ala ni lo.

Inrinnia an inbeihnaah hian Ukraine raldomite chuan Chechen special force, tank 56 nena fehchhuakte hi an lo tingmit a, Chechen general chhuanvawr Magomed Tushayev chu thi zingah hian a tel. Ani hi ralhrat khawkhawng, Warlord tia an koh mai thin, Chechnya National Guard-a motorized regiment 141 chunga an hotulu ber a ni nghe nghe.

Chechen Republic hi Russia atanga inlakhran tum reng, independent hial pawh lo puang tawh an ni a, a mi tam zawk hi Muslim an lo ni bawk nen, raldo lamah an hmingthang hle.

Kum 1917 ah independence puang mahse an hlawhtling lova. USSR kehdarh hlim chhawn kum 1991 khan independence an puang leh a, Russia pawhin tingaihna a hre mai lo. Tichuan, kum 1994 atangin Russia leh Chechen te hi indovin Chechen War I hian kum thum dawn a awh.

Kum 1996 April thlaah mipuiten Chechnya President atana an thlan hmasak ber Dzhokhar Dudayev chu Russia sipaiten a phone hman atangin satellite hmanga a awmna hre fuhin kil thum atangin bomb leh missile hmangin an bei thut a, an that. Russian huatna a alh nasa zual.

Chechen sipaite chuan Russia sipaite tukzalin Chechenya-a khawpui lian ber Grozny an la zui a, Russia chan a chau tih hriain khatih hunlaia Russia President Boris Yeltsin chuan inkahhai a puang zui a, an sipaite pawh Chechenya atangin an inhnukdawk ta a ni.

Amaherawhchu, inrelbawlna hran an neih chinah Chechen hotute chuan an eiru nasa em em mai a, ram hrang hrang atanga tanpuina lo lut chuan mipui hnen a thleng phak si lova, mipui an inlungrual ta lo.

Hetia tualchhunga innghirnghona an neih lai tak, kum 1999 khan Russia chuan a bei nawn leh ta sak. Hei hi Chechen War II tih a ni. Tualchhung buai avanga inrelbawlna nei tha lo Chechen sipai te hi a hma atanga lo inbuatsaih lawk tawh Russia lakah kum 2000 khan an tlawm ta nge nge a ni.

Kum 2003 khan Russia nena an indo vawi hnihna hnu lama an President hmasa ber atan Akhmad Kadyrov chu ruat a ni a, mahse, kum 2004 khan Grozny football stadium-a a thusawina stage hnuaiah bomb kam ruin an bomb hlum ve leh.

Tichuan a fapa Ramzán Kadírov chu Russian President Vladimir Putin chuan a aiawhtu atan a ruat a, tun thleng hian an ram kaihhruai hna a la thawk a ni.

Chechen special force te hi “Kadyrovites,” tih niin mipui thlan Ukraine hruaitu ni mekte thata, Russia duhzawng hruaitu ruat an tumna kawnga a hmatawnga awmte an ni.

Mahse, tun tumah erawh an hlawhtling ta rih lova, engnge an an zel ang tih erawh hriat a chakawm khawp mai.