Feb 03.2022 : Nimin khan Mizoram Legislative Budget Session neih chhunzawm a ni a, zawhna leh chhan hun hman a nih bakah minister te demand pharh a ni. Health Minister Chhanna Dr R Lalthangliana chuan PATH (USA) in a thlawna Mizoram a pek genomic sequincing laboratory chu ZMC/VRDL ah bun fel tawh niin trial run tum 3 neih tawh ni mahse reageant/kit dik tawk loh vangin ala hlawhtling lo tih a sawi a, "Hei vang hian genomic sequincing hi tih tan ala ni lo. Tunah hian reageant/kit thar leh technical specialist te lo thleng mai tura beisei a ni," a ti.

MNF member Dr ZR Thiamsanga & Zothantluanga te zawhna chhangin nikum January 16 atanga kumin February 16 thleng khan Mizoramah vaccine la tawh hi 1st dose 804336 (94.41%) niin 2nd dose la 639364 (79.49%) an awm tawh a, first done la atanga chhutin 2nd dose la hi 76.49% an ni. Vaccine pek tawhah motor luh theihlohna hmunah a kalpui chak theih loh laiin network that loh vangin hmun thenkhatah harsatna a awm tih a sawi a, sakhuana avang leh social media-a thu dik tawk lo thehdarh avangin vaccine la duh lo an awm tih a sawi bawk.

MNF member C Lalmuanpuia zawhna chhangin minister chuan ministry of science & technology atanga dawn mobile I-Lab chu hman ala ni lova, "Mobile I-Lab van test nei tur hian buaipui ngai tam tak a awm a, ICMR approval lak a ngaih bakah Bio-Medical Waste Management tifel turinhmalak mek a ni. Test tih theihna tura mamawh hrang hrangte lakkhawm mek zel a ni a, thawktu tur Microbiologist leh Laboratory technician te pawhin training an nei mek a ni," a ti.

Japan nena thawh dunna tur (JICA) - Project Establishment of Mizoram State Super Speciality Cancer Hospital & Research Centre, Zemabawk chu ruahmanna kalpui mek a ni tih a sawi a, "JICA mi leh sa ten bultanna atan preparatory survey nei mekin project amount chu Rs. vbch 500 a ni a, he project-in a tum ber chu Aizawl-ah Mizoram state super speciality cancer & research centre din a ni," a ti. 

MNF member Dr K Pachhunga zawhna chhangin Mizoram thingtlang hriselna tih hmasawnna kalpui turin sub cente 183 chu health & welness centre-a siam a ni tawh a, he scheme hian PHC zawng zawng, Urban PHC telin leh Sub Centre PHC awm lohna khuaa mite chauh a huam tih a sawi. NHM hnuaia HWC ah hian B.Sc nursing dah an ni a, NAM (Ayush) HWC ah chuan homeopathy doctor dah an nih thu a sawi. Congress member Ngunlianchunga zawhna pawh chhangin NRHM hnuaiah thawktu 2011 awmin dah ngheh tuma hmalak a nih thu a sawi. 

SWD Minister Chhanna Social Welfare directorate chu 21.8.2018 khan pahnih – Directorate of Social Welfare & Tribal Affairs leh Directorate of Women & Child Development-ah te \hen tawh a nih thu Dr K Beichhua chuan Congress member Lalrindika Ralte zawhna chhangin a sawi a, notification pawh 21.8.2018 ah chhuah a nih thu a sawi. 

Sports Minister Chhanna Sports minister Robert Romawia Royte chuan Serchhip Sports Complex chhunga Sports Stadium enkawl hna chu Serchhip District Sports Committee kutah hlan a la ni lo tih ZPM MLA Lalduhoma zawhna chhangin a sawi a, "District Committee din dan turah Mizoram State Sports Policy 2020 anga ruahmanna thar siam ala peih loh vang a ni," a ti. 

MNF member Lawmawma Tochhawng zawhna chhangin minister chuan sports hmasawnna atan central sorkar, ministry hrang hrang atanga sum hmuh te hi centralin Mizoram hmuh tura a dah hran bik a ni lova, state hrang hrangten project siama dilna an thehluh a\anga central sorkarin  pektlaka a ngaihte a pek a nia, Mizoram sumin a tawrh phah lo tih a sawi. Central sector scheme za-a za central-in a tumah project cost atangin 7% chu state kutah a lut a (1% labour cess, 6% GST state share) CSS, state share ngai chi ah pawh state sorkarin sum tlemte hmanga hmasawnna ruhrel chi hrang hrang rotling tak takte a din theih thin avang te, Mizoram chhunga contractor te nitina inhlawhfa thin te  leh bungraw chi hrang hrangzuartuten sum an lo hmuh ve thin avangin Mizoram sumin a tawrh phah lo mai ni lovin an hlawkpui em em zawk a ni a ti. 

Tourism Minister Chhanna Tourism minister Robert Romawia Royte chuan Chalfilh Tourist Destination chu National Green Tribunal judgement order (19.1.2022) in thiat tura a tih angin thiah tum a nih thu a sawi a, Chalfilh Tourist Destination ah hian building leh structure hmun 8 a awm a, infrastructure sakna property awm zawng zawng hlut zawng chu Rs. 759 lakhs a nih thu leh NGT judgement order hi supreme court-ah appeal tura hmalak mek a nih thu ZPM member Vanlalhlana zawhna chhangin a sawi a ni.

MNF member Lawmawma Tochhawng zawhna tourism minister-in a chhannaah Mizoram-ah state level tour guide 89 an awm mek a, heng mite tan hian training vawi 1 an nei tawh a ni. UD&PA Minister Chhanna Minister Tawnluia chuan Aizawl bazar pui sak tharna tur 'Modernisation of Bara Bazar' DPR chu approve tawh a ni a, tender tura buatsaih mek niin a rang thei ang bera sak tan tura hmalak a nih thu ZPM member Dr Vanlalthlana zawhna chhangin a sawi. PAHOSS pawh kalpui mek a ni a, mi 11 in sa zo tawhin tangkai taka hman mek a nih thu a sawi. "Tunah hian mi eng emaw zatin Parking House sak hna hi an kalpui mek a ni," a ti.

MNF member Lawmawma Tochhawng zawhna chhangin minister chuan Council of Minister-in 16.11.2021 khan Lunglei Municipal Council dinna tura rawtna a pawm a, notice of intent hi 22.11.2021 khan chhuah tawhin objection awm te sorkarin a ngaihtuah hnuah LMC dinna tak tak hi chu notification hmangin tihchhuah leh tur a nih thu a sawi. LMC bul tanna atan Rs. 80 lakhs dah a ni a, chief executive officer (CE) secretary, superintendent, finance & account officer (FAO) leh assistant post pakhat theuh siam a nih thu a sawi bakah GAD atangin LMC office hawn phalna hi 8.2.2022 khan hmuh a nih thu a sawi bawk.

Post a Comment

Powered by Blogger.