Lawngtlai, February 16, 2022 : PHE Department ten Chhimtuipui tui la a, Lawngtlai khawpui an chawmnaa tui pump khawl, Chengper Hmunzawla mi chu kar kalta Zirtawpni atang khan electric thahrui hmangin pump theih a ni lova. Diesel khawl hmangin tui hi engemawchen pump theih ni tho mahse, mipui mamawh a phuhru zo lo nasa a, hei vang hian mipui ten harsatna an tawk mek a ni.
Electric thahrui hmanga tui pump na hi nimin atang khan company lam mithiam ten an siam tan a, a hmuna thutchilhtu PHE Department hotute chuan siamthat theih a nih hun tur an sawi lawk thei rih lova, a chhiatna lai zawn hna chu mithiamten an thawk mek niin an sawi.
PHE Lawngtlai WATSAN Division a Senior E.E, Pu Netralal Jaisi chuan, mipui mamawh khawp tui an pek theih loh vangin mipui hriatthiamna a ngen.
Post a Comment