Rauthla Editorial, February 25, 2022 : Sorkar hnathawk leh ram hruaitute zingah sorkar lirthei kawl eng emaw zat an awm a. Heng an lirthei kawlte hi an mimal leh chhungkaw pawimawh atan te pawh an hmang ve thin bawk a. Sorkarin an maintenance na atan sum an dah sak erawh an khawp meuh lo tih theih tur a ni a. Hei hi eng dang vang mah niin a lang lova. Mahni ta anga kawl siin sorkar lirthei a ni tih rilru pu chungin ui na neih map lova an kawl thin vang te pawh a ni mahna.
Sorkar lirthei an kawl chauh ni lo, sorkar lirthei hman mai tur a awm thin a. A bik takin sanitation lirthei hi mimal anga hmang Ram hruaitu zing ah an awm leh zeuh zeuh thin a. Hei hi thil fuh lo tak mai a ni a. Mipui ten tangkai taka bawlhhlawh kan paihna tur atan budget atanga lei a ni a. Mahni mimal insakna bungraw thiarna atan te, leivung phurhna atan te, Balu leh thildang dang mahni mimal thil phurhna atan kan hmang nasa lutuk hi a fuh lo hle mai. Hetiang mi Ram hruaitu, sorkar officer te zingah kan awm palh a nih hlauh chuan kan sim pawh a tha hle ang.
Sorkar term hmasaah khan bawlhhlawh paih motor khawpui pawnah ram hruaitu thenkhatte'n an hmang a, tihchhiat a ni a, ngaihtuah chhunzawm a nei lutuk lo te kha a pawi tak zet a ni. Ram hruaitu zingah sorkar lirthei mahni ta ang chiah a en, a siamthatna tur erawh sorkar a bill siam duh kan awm fo thin hi i sim theuh ang u.
Post a Comment