February 26, 2022 : Russia-in a ram thenawm Ukraine a beihna chu a ni thumna’n ala chhunzawm zel a, nizan khan Russia sipaite hian Ukraine khawpui ber Kyiv bei tan mahse an la la mai thei bik lo.


Nizan khan Kyiv khawpuiah hian missile leh bomb puak ri vawi 50 chuang hriat tur a awm a, laipui ri a chawl meuh lo tih Kyiv Independent chuan an tarlang.

Russia sipaite hian he khawpui pawimawh hi lak ngei tumin nasa takin bei mahse an thuhnuaiah a la awm tih Ukraine National Security and Defence Council Secretary Oleksiy Danilov chuan a sawi.

He buaina avang hian Ukraine mi leh sa 100,000 chuang chu an sahimna himna zawngin an ram thenawm leh hmundangah an tlanchhia a, mipa kum 18-60 inkarte erawh an ram chhuahsan phalsak ni lovin silai hum vek tura tih an ni a, nizan khan Kyiv khawpuia cheng mi 18,000 te chu assault rifle pek a ni nghe nghe nghe.

Media thenkhatin Ukraine President Volodymyr Zelensky chu sahimna’n ramdangah a tlanchhia niin sawi mahse, Zelensky hian a tlanchhe lova, a tawp thlengin an tang ral raih dawn a ni tih sawiin an khawpui kawtthler a fang lai video a tarlang a ni.

Kyiv khawpuia Gorodetsky House hmaa ding chungin Zelensky chuan Russia sipaite hmaah an inpe dawn lo a ni tih sawiin, “Internet lamah thuthang dik lo tak tak darhin kan sipaite chu an ralthuam dahthla tura ti ang leh ram danga tlanchhe tur angin min sawi a. Dawt thuleng mai a ni.

“Heta hi ka awm e. Kan ralthuam kan tung dawn lova, kan ram hi kan venghim dawn a ni,” a ti.

Zelensky hi US sawrkar chuan Ukraine chhuahsana America-a tlanchhe turin thurawn an pe niin Washington media pakhat chuan an tarlang a, mahse, he President hian hun khirh an tawh lai taka mahni ram chhuahsan a duh loh thuin US sawmna hi a lo hnar a ni.


Zelensky chuan, “Hetah inbeihna a thleng mek a, hawi khawthawn aiin silaimu ka mamawh zawk,” tiin. “Min bei a nih chuan kan tukkhum ni lovin kan hmel eng in hmu zel ang,” tiin anmahni runtu Russian te chu tlanchhiatsan lovin an bei let zel dawn tih a hrilh bawk.

Media thenkhat tarlan danin tun tum inbeihnaah hian Russia sipai 3,500 chuang an thi tawh a, mi 200 dawn Ukraine sipaiten an man tawh bawk. Russia indo  thlawhtheihna 14 kahthlak ni tawhin helicopter 8 bakah tank 102 an tihchhiatsak tawh bawk a ni.

Hetiang hi thil awmdan ni mahse Ukraine hian ralthuam neih that lama khawvela pahnihna hauh mektu nia Business Insider-in an tarlan Russia hi ni rei a dang thei tawh lo ang tih chu chalkawlh pen ang fawkin a chiang thung.

Russia hian raldo mi sipai 766,055 vel a nei mek a, Tank 15,398 neiin indo thlawhna 3,429 a nei bawk. Lei lam sipai tir kher lo pawhin Ukraine sipai hmun pawimawh zawng zawng hi ral atangin a kap darh vek theih a rinawm a. Chutih rual erawh chuan ram tana thih huam a ram neituite inpekna ang erawh an nei ve lo ang.

Nizan khawthim chhung zawng khan Kyiv khawpuiah hian inbeihna a thleng a, ralkhel dar ri aia hriat zin an nei lo. A ram neitute hi an khawpui ber a kaw tawpah an tan ve tawh avangin beih erawh an sak hle ang.

Ukraine ambassador to Austria Olexander Scherba chuan, “Zing ni chhuah rual khan khawpui chhunga inbeihna thawp chu a reh a, Vampire Movie-a Ni chhuah ruala Vampire rual an bo diak ang hi a ni ber,” a ti.

Tun tum buainaah hian Ukraine milar leh infiammi te an tang na hle a, an Miss Contestant hluite thlengin sipai an zawm. Heavyweight boxer WBA (Super), IBF, WBO leh IBO title kawl mektu Oleksandr Usyk chuan training a neihna London chhuahsanin ram tana beitute a zawm a.

Heavyweight boxer rothap, Kyiv Mayor ni mek Vitaly Klitschko leh a nau Wladimir Klitschko te pawhin sipai thuam famkim nen ral an do bawk.

Russian mipui tam tak chuan Ukraine run duh lovin kawng an zawh a, hengho hi Police ten an rut khawm hmak hmak thung. Russian tennis player, world No. 1 thar tur Daniil Medvedev leh World No. 7 Andrey Rublev te chuan indo an duh lohzia langsar takin an lantir a, Rublev phei hi chuan Zirtawpni zan Dubai Tennis Championships-a Poland player Hubert Hurkacz hneha final a luh chiah khan Camera-ah ‘No war please" tih ziakin indo a duhlohzia a tarlang hial a ni.

Ralthuam leh sipai lama US leh a sangawizawnpuite tangrual pawl NATO chuan an pawl zawm duh Ukraine thlavang hi na takin hauh mahse an member a la nih si loh avangin chuti ngawtin an pui thiang lova. NATO member an beih vaih erawh chuan che nghal turin an inpeih a, Indo Lawng leh Fighter Jet te pawh Russia ram thenawm NATO member ram hrang hrang chhawp hnaih mek a ni.

Ukraine hi USSR ram bung khat ni thinin USSR a kehdarh hnuah kum 1991 khan Russia leh Belarus te nen thawkho zel turin Commonwealth of Independent States (CIS) an din a. Mahse, Ukraine hian khawthlang ram lam awnin ralthuam lamah pawh NATO zawma Russia hawisan a duh a, hei hi Russia hian a ngaithei lo hle.

Kum 1997 hnu lamah ringawt pawh Europe ram 14 zetin tunhmaa an belh thin Russia hnungchhawna NATO an zawm tak avangin NATO ramin an hual vel mek Russia hi thinthiin a mu thei ta lova. 

Tin, Ukraine hi ‘Breadbasket of Europe’ tih hial khawpa ram hausa, Wheat thar tam, Uranium laichhuak tam leh Nihawichi atanga Oil siamchhuah tam lamah phei chuan khawvela a ber nihna hauh thei a nih avangin Russia hian a hausakna itin a run a ni thei bawk ang.

Hmuh let tur nei lovin tu ram mah hi ramdang buainaah an inrawlh ngawt ngai lo. Tu ram mahin a lo thlawnin sipai, ralthuam leh sum tam tak an khawhral ngawt duh lo.

Post a Comment

Powered by Blogger.