Rauthla, February 25, 2022 : Russia-in a ram thenawm Ukraine a runna kal zelah inbeihna a nasa telh telh a, a tirah Ukraine atanga inlakhran duh ram bial pahnihte chauh tuam tum anga insawi Russia hian Ukraine khawpui Kiev an hnaih tawh hle. Russia hian nimin zing atang khan Ukraine hi kil hrang hrang, chhim leh hmar bakah chhak lam atangin an bei a, Russia thiantha Belarus chuan Ukraine sipaite bei turin an sipaite a tir lut niin an sawi bawk.
Ukraine khawpui ber Kyiv mipuite chuan an khawpui atang hian bomb puak ri an hriat phak tawh avangin mi tam tak chu an sahimna zawngin an thenawm ramah an tlanchhia a. Hetih mek lai hian Ukraine President chuan an ram beihna chu an chhan let ngei tur thu sawiin Europe khawmualpuia indopui intanna a ni thei dawna a hriat thu a sawi.
NATO chuan an pawl zawm tum mek Ukraine, Russia-in a run chu rawng taka chetna, hun rei tak chhung atanga lo ruahman lawk tawh, tiin an sawisel a, UK Prime Minister Boris Johnson chuan Russia hrekna thar puangin Russia ram mi hausa, defense company leh Bank te chu khawih chet theih lohin a hrensak. Ram hrang hrangin an demrawn Russia President Vladimir Putin erawh a la inhrosa nasa hle a, Moscow thiltih lo chhang let apiang chu an nuai tel nghal zel tur thu a sawi a ni.
Nizan khan Ukraine khawpui daifema awm thlawhna tumhmun pawimawh tak chu Russia sipaite hian khawmual atangin an bei a, Russian paratroopers te chu Kyiv bul lawka awm Antonov Airport-ah tumin thunun an tum a. Ukraine chuan laipuiin an lo chhang let a ni. He airport hi ram dang atanga bungraw chawkluhna pawimawh tak international cargo port a nih bakah sipai thuthmun a ni bawk. Kyiv atanga Mel 20 vel lek a nih avangin Russia hian an thunun a nih vaih chuan Ukraine khawpui ber hi an bei harin a rinawm tawh lo. CNN chuan Russian paratrooper te hian tukin zing khan Antonov airbase hi an thunun tawh a, Russian paratroops te hi a chheh velah hmuh tur an tam tawh, tih an tarlang ve thung.
Ukraine national guard te chuan Russian sipaite hi an beilet tih sawiin khawthlang intelligence officials te rin ai daihin Russia hian hma an sawn chak a, rin phak bakain Ukraine ram chhungah an lut thuk tawh. Ukraine chhim lam Belarus leh hmar lam Crimean peninsula atanga beitu Russian armoured columns te chuan hma an sawn zual hle a. Thlawhna tumhmun ber an thunun theih chuan Kyiv an beih chhunzawm thuai an ring. Russia hian thlawhna leh thil dangin Ukraine khawpui lian zuala an sipai leh ralthuam hmun pawimawhte a bei nia sawiin sipai hmunpui 70 an tichhia niin an tarlang a. Ukraine lam chuan an sipai 40 thiin Civil mi 10 in nunna an chan tawh bawk niin an tarlang. Hetih mek lai hian media thenkhat chuan Ukraine sipai 100 chuangin nunna an chan tawh niin an tarlang ve thung.
Ukraine sipai te chuan nimina inbeihna hrang hrangah Russia thlawhna 6 an kapthla tih an sawi a, Russia helicopter raldomi an kahthlak video an phochhuak. Russia hian sipai hmunpui chauh an bei angin sawi mahse Ukraine khawchhak lam Donetsk region-ah Damdawi In an kap niin BBC chuan an tarlang a, an lawng chawlh hmun pawimawh Odesa leh Mariupol bakah Kharkiv-ah nasa takin an inbei mek bawk. Ukraine President Volodymyr Zelenskyy chuan nimin chawhnu khan, sipai uniform ha chungin a ram mipuite hnena a thuchah a puang chhuak a. “Russia chuan kahpathir chhah tak hmangin khawvel changkang tawh takte nen indaidanna bang a siam thar a. Ukraine-ah chuan he daidanna bang hi an rawn hun ve kan phal tur a ni lo,” tiin Russia chet dan chu tunlai khawvel ang atan chuan thing a tih thu a sawi.
President Zelenskyy chuan an sipaite chuan khawchhak lam Donbas region an vemhim a, Kharkiv bulah Russia sipaite an lo chhang let bawk tih sawiin chhim lama awm Kherson leh nuclear plant awmna thin Chernobyl-ah te inbeihna nasa tak a awm mek tih a sawi. Inbeihna kal zelah Russian sipai engemawzat an man tih sawiin vawiin khan an hmelmate hi lo barakhaihin an thlawhna leh indo lirthei an lo tihchhiatsak nual tih a sawi a ni. A chetdan avang hian Russia hi UK leh USA te bakah European Union chuan kawng hrang hrangin an hrek dawn tih an puang tawh bawk.
Post a Comment