Rauthla, February 11, 2022 : Serlui bialtu MLA Pu Lalrinsanga Ralte chuan a bialchhungah Health Clinic Centre thar 4 a hawng a, Clinic Centre hawn thar pali a thawktu Health Worker te hi bialtu MLA chuan MLA Fund atangin a chhawr vek a ni.
Mizoram leh Assam ramri depa awm Saihapui 'V' ah Health Clinic Centre Building, MLA Fund hmanga sak thar chu nimin khan Pu Lalrinsanga Ralte hian a hawng a, Rengtekawn leh North Chhimluang a Health Clinic Centre te chu hawng nghal a, North Chhimluanga Health Clinic Centre Building hi Rural Development hnuaia Material Component atanga sak a ni. Serlui bialtu MLA chuan Assam ramri dep Saihapui 'V' a Health Clinic Centre dah chu Sorkarin ramri a ngaihpawimawh zia a lantirna a ni a ti a, a bialchhunga engtiklai maha Health Clinic Centre la awm ngailohna khuaah Health Clinic Centre pali lai hawn thar a ni ta chu lawmawm a tih thu a sawi bawk.
Covid hrileng avanga harsatna an tawh mek avanga sorkar atanga thawktu dah mai a harsat rih avangin MLA Fund hmanga thawktu chu rawih phawt an nih tur thu leh Health Clinic Centre hawn thar te chu a tul anga tihchangtlun zel a nih tur thu Pu Lalrinsanga Ralte chuan a sawi bawk.
Sorkar chuan hmasawnna hnathawk turin lei rem a rap chho ve mek zel a, mi rethei leh harsa zawk ten hamthatna an neihve theihna turin theihtawp an chhuah zel dawn a ti a, Financial Year tharah chuan kuthnathawktu ten hmasawnna kawng an zawh a, bul an tan vena turin SEDP sem tuma hmalak mek a nih thu a sawi bawk a ni.
Post a Comment