Siaha, February 23, 2022 : Nimin khan ZPM Working President Pu K. Sapdanga chuan Siaha Press Club-ah chanchinbu mite kawmin, “Mizoram mipuite hian ‘Kalphung Thar, Mipui Sorkar’ hmel hmuh an duh tawh a, ZPM Chief Ministerial Candidate Pu Lalduhoma hi sawrkar kaihruai tura enchhin an duh tawh bawk a ni,” a ti.
Pu K. Sapdanga chuan, “Mizoram mipuiten Congress party chu thuneihna pêk leh mai hun an la ti rih lo a, kan hrawn mek MNF sorkarah lah hian Chief Minister berin MLA fel tak tak, thil tha duh, hmangchang hria hman tur a ngah tehreng nen, chung mite ai chuan Kamrula-te, Abu Majumdara-te a ring zawk miau bawk si a. Mipui mai bakah an party hruaitu lian tak takte pawhin hetianga Chief Minister a che ta mai hi mak an ti a, an party chhungah inhruipawhna nasa tak a thlen phah mek a, Zoram mipui hian sawrkar nawntir chi niin an hre tawh lo,” a ti.
Siaha khawpui chu MLA hmangchang hre ber pawl nei mah se, minister zinga CM-in a kaihkuah bik zingah an MLA a tel phak loh avangin Mara District leh Siaha khawpui hmasawnna thlengin a tuar nia a hriat thu sawiin, ZPM party-in thuneihna a chan hunah Siaha khawpui hian, ZPM mi ngei Cabinet Minister an neih theih nan theihtawp chhuah an tum thu tih a sawi bawk.
Pu K. Sapdanga chuan, “Kum 2023 MLA inthlanpuiah Mizoram mipuiten ZPM an tinzawna a lan avangin, MNF leh Congress party-te hian, ZPM sawichhiat leh ZPM hotute inngeih lo anga phuahchawpa thehdarh chu hna pui berah an nei dun mek a, hemi kawngah hi chuan an inthurual viau nghe nghe a ni," a ti a, "ZPM chuan Chief Ministerial Candidate atan Pu Lalduhoma chu lungrual takin an pawm a ni," a ti bawk.
Post a Comment