Rauthla 24.Feb,2022 : - Mizoram Legislative Assembly budget session neih mekah nimin khan zawhna leh chhanna hun hman a ni a, amaherawhchu session tan a nih hnu lawkah eptu MLA — ZPM leh Congress member te chuan PMGSY sum Rs. 100 lakhs, dan kalha la nia sawi speaker Lalrinliana Sailo kaihhruaia rorel duh lovin House an chhuahsan. ZPM chuan speaker chhuichiang tura ngenna hi Lok Ayukta-ah an thlen nghal bawk.
Rorel tan a nih dawn hian speaker chuan Bible chang a chhiar a, a chhiar zawh rualin ZPM member Lalduhoma a lo ding a, "Tunhnai maiah Ngaizawl khaw kawng laihnaah Rs. 100 lakhs zet i lo ei ve a ni tih chiang taka sawi thawmte kan lo hre ta a. Hei hian Ngaizawl khaw mipui leh Zoram mipui rilru a ti na em em a, a pawi kan ti tak zet," tiin House zahawmna tih bawrhbana a awm lohnan leh speaker tan ngei pawh House kaihhruai loh chu a mawi zawka an hriat thu a sawi a, a hma ni in House Leader Zoramthanga hnenah pawh hemi chungchang an thlen tawh thu hi a sawi. ZPM memberin a sawi lai hian a tawng hriat chian theih loh turin ruling member an lo tawng ve bawk a, eptu party te hi BJP MLA awmchhun BD Chakma tih loh chu House atangin an chhuak vek a ni.
Ruling member atangin Dr K Pachhunga chuan video siamchawp vel mai maia buai chuan House chhungah thu tur an awm loh mai a hlauhthawn thu a sawi a, speaker Lalrinliana Sailo pawhin, "Pathian khawngaihna in mi pawisa nai khat mah ka la la lo" a ti bawk.
Nimin vek khan ZPM party chuan Assembly speaker chu PMGSY kawng siam hnathawhah dan kalhin a lo inhnamhnawih nia hria in Lok Ayukta-ah chhuichiang tura ngenna an thehlut nghal. Hemi chungchanga thuchhuah an siamah Mizoram Legislative Assembly Speaker Lalrinliana Sailo chu tunhnaia Ngaizawl NGO Coordination Committee leh VC thuchhuah te, Ngaizawl khawtlang hruaitute leh Coleen Lalsangpuii leh a manager-te inkawmhona audio voice record atangin PMGSY kawngsiam hnaah dan kalhin a inhnamhnawih ngei nia an hriatthu an tarlang a, Assembly speaker chhuichiang tura ngenna hi Lok Ayukta-ah an thehlut tih an sawi a ni.
ZPM party chuan Mizoram Governor Hari Babu Kambhampati hnenah ram dinhmun sawipui turin ngenna an thehlut a, "Mizoram Assembly Speaker Lalrinliana Sailo hi heng thil diklo atangin a fihlim a ni tih fiah a nih hma chuan Assembly House zahawm tak hi kaihruai lo turin kan duh a, kan MLA te dinna hi kan thlawp tlat a ni," an ti.
Post a Comment