Rauthla, February 24, 2022 : Serbian striker tuna Championship club Fulham tana khel mek Aleksandar Mitrovic chuan tun season khelh mekah goal 32 a khung a, championship chanchina season khata goal khung tam ber a ni mek.
Mitrovic hian nilainia Peterborough an khelh tumin goal a khung leh a, tihian season hmasaa Brentford striker Ivan Toney-an season khata goal 31 a khung chu a khum ta a ni.
Kum 27-na hmang mektu Aleksandar Mitrovic hian a football career hi kum 2012 khan Partizan-ah a tan a, he club tan hian goal 13 a thun. Kum 2013 khan Belgium club Anderlecht lamah a insawn a, he club tan hian goal 36 a thun bawk. Kum 2015 khan beiseina sang tak nen Newcastle United chuan an lalut a, Alan Shearer thlak thei turin an ngai. Mahse, he club-ah hian a che fuh vak lo, match 65 khelin goal 14 a khung. February 2018 khan loan-in Fulham a awm a, July 2018 khan a nghetin a zawm. Fulham tan hian goal 85 a khung tawh a ni.
Ram tan kum 2013 khan inlan tanin match 69 a khel tawh a, goal 44 a khung tawh bawk.
Championship hi English Premier League hnuai chiaha awm niin, tunah hian Fulham hian point 67 neiin table chung berah an awm mek a, match 14 khelh tur a la awm a ni.
Post a Comment