Champhai, February 11, 2022 : Cheng nuai 50 hu Heroin no 4 Champhai Police ten an man a, Heroin hi Gram 1282 a rit niin Champhai Police-te'n tum khata Heroin an man tam ber tum a ni.
Champhai District S.P. Pu Lalrinpuia Varte in Special Report a siamdanin Champhai Police te chuan niminpiah zing khan Heroin No.4 ningeiahriat, Hawng 100, Sahbawn bawma thun manin a neitua puh mi pahnih pawh an man nghal a. Champhai Police te hian nizan hmasa zanlai khan Zokhawthar kawngah Bolero pakhat an lo tiding a, Bolero-a chuangte hi chhukin an thil phurh, Sathaip chu kawngthlangah thehthlain an tlanchhe zui a. Police te hian umzuin nghalin Ubaid Ullah (30) Patharkandi, Karimganjleh Zakir Hussein (25) Badalpur, Karimganj, Assam a cheng veve nia insawite chu an man a, Motor atanga an thil phurh an thehthlak hi zawngzui mahse, an hmu mai lo a, nimin zing khan zawngzui lehin Satha-ipchhunga Heroin Hawng 100 awm hi an hmu ta a ni. Heroin neitua puh mi 2 te hi ND & PS Act tlawh chhana thubuai siamsak an ni a, heng mite hi Champhai District Court-a hruai an nih hnuah Lung Inah khung nghal an ni a. Heng heroin an phurhna lirthei pawh hi hrensak nghal a ni.
Hetihlai hian nizan hmasa dar 8:00 vel khan Chalbawiha Junction Khankawn Champhai Police check gate duty te chuan sahbawn dahna bawm 5 chhunga dah Heroin ni ngeia hriat 63 gram a rit manin tualchhung hralhnaah chuan cheng nuai 2 leh sing 5 hua chhut a ni a, hemi bakah hian Methamphetamine ni ngeia hriat mum 10,000 an man bawk a, hei hi cheng nuai 30 hu a chhut a ni. A phurhna Maxi cab khalhtu C.Lalpeksanga (29) Buang khua, Champhai District nia inchhal chu man a ni a, Champhai Police station-ah thubuai ziahluh nghal a ni a, vawiin khan Drugs phurtu leh a motor hman hi Court ah kalpui a ni.
Champhai Police te hian karhmasa Zirtawp leh Inrinni zan khan ruihhloNo 4 Hawng 4 an lo man tawh bawk a ni.
Post a Comment