Rauthla Thlirvelna, February 28, 2022 : Kan ram roreltu, dân siamtute chet velna pawimawh tak, Assembly budget session kal lai mekah hian, ni danga an tih ang thoin eptu MLA te zawhna, ziaka chhân chi Unstarred Question kan tih mai hi, mi nawlpui tân neih theih a ni lo a. MLA te leh Media lam thawktute leh mi tlemte tan siam Thin a ni. Minister ten an chhanna chu media lamah hmuh tur awm zauh zauh mahse, a tam zawk hmuh zui lohin mipui tan chuan a tham ral fo a ni ber a. House document te hi a theih ang ang chu ka lo en zui ve nasa Thin hle a, ka hnathawhnaah pawh min pui Thin viau mai. Helaiah hian tawi fel thei ang berin zawhna chhanna ka rawn ziak dawn a, sawi zauna erawh a leng loah ngai ila, mipui nawlpui khawih thil kan thlang ang. Minister ten an chhanna kan tarlang ang a, a tawpah a zawttu tarlan a ni ang. ( 23rd Feb 2022 bik)
** PWD : KR Construction Thuampui hnuaiah contract hna Tender hmanga thawh pahnih nuai 4,722.42 leh Restricted Tender hmanga thawh nuai 4,092.95 pek a ni tawh a, a vaiin Rs 8,815.37 a ni. Hetah hian Lengpui Airport kaihhnawih hna nuai 2,727.73 a tel. (Pu Lalduhoma MLA zawhna chhanna)
** Taxation Deptt : Myanmar atanga dan lova Kuhva lo lutah sorkarin GST a laka dan tlawhchhan zawhna chhan dan, “GST registration nei teh sorkar (Central/ State ah chhiah an pe thin a. Ram dang atanga lo lut a ni em tih chhui hi Taxation Deptt thuneihna (Jurisdiction) pawn a nih avângin a chhui ngai lo va. Eng bungrua pawh ram chhung a lo lut, custom frontier rawn pel tawh chu Tax lakna bungrua a nih chuan GST hi lak tur a ni,” (Pu Lalchhuanthanga MLA zawhna chhanna)
** Health Deptt : Hna tam tak thawh a ni a, chung zinga directorate pakhat Directorate of Health Services (Annexture -1) ah hian ZAMZO Engineer Construction & Consultancy Bawnkawn, Durtlang Road chuan hna lian 11 an thawh tawh a. Hna 11 an thawk a, a vaiin nuai 1983.50 a ni. (Pu Zodintluanga Ralte MLA zawhna chhanna)
** PWD : Zoramchhana, Electric Veng in hna lian tak tak panga a thawk a, hei hi kum 2021 Feb- Dec chhunga mi a ni. Heng hna pangate hi a vaiin nuai 7,476.02 a ni. (Pu Lalduhoma MLA zawhna chhanna)
** Sports & Youth Services Deptt : MNF Ministry pian hnuah phullem hmun ngaah phah a ni tawh a, Saitual, Hnahthial, Lengpui, Kolasib, Khawzawl-ah te a ni. (Pu VL Zaithanzama MLA zawhna chhanna)
** Sports & Youth Services Deptt : Kum 2018 MNF ministry pian hnuah Sports Infrastructure atan lungphum 21 a awm tawh a, heng zinga 11 hi hnathawh tawh a ni a, 10 te rawh tender buatsaih mek a ni. (Pu Zodintluanga Ralte MLA zawhna)
** Health & Family Welfare deptt : November 2021 thlenga Mizorama HIV/AIDS vei hmuh chhuah tawh chu mi 25,358 a ni. ART Centre a enkawl zingah HIV positive thi report dawn tawh zat mi 3,364 a ni. Chutih laiin heng mite hi AIDS vang liau liaua thi erawh an ni vek lem lo. Tunah enkawl lai mi 12,215 an awm mek a ni. (Pu Vanlalhlana MLA zawhna chhanna)
** UD&PA : PAHOSS hnuaiah tanpuina dawn dan : 1st Installment-ah 140, 1st Installment & 2nd Installment dawng tawh mi 47, 1st Installment & 2nd Installment & 3rd Installment dawng tawh mi 11 an awm a. Lirthei dah theihna siam tawh zat hi LMV – 68, Two Wheeller -323 leh Parking House hi mi 11 in an sa zo tawh. PAHOSS chu traffic tiziaawm tura duan a ni. (Pu Zodintluanga Ralte MLA zawhna chhanna)
** GAD : SEDP Board hnuaia Vice Chairman te hi MLA nilai an nih chuan Mizoram Salalries, Allowances & Pension of the Members of the Legislative Assembly Act 1999 in a duan sa bak hamthatna dang a dawng lo. SEDP hnuaia Board Vice Chairman te hi MLA nilai an nih loh chuan hamtThatna leh facilities an dawnte chu :
1. Honorarium – Rs 40,000 per month
2. Sitting Allowance - Rs 1,000 per day
3. Office Landline Telephone bakah /mobile phone allowance Rs 1,000 per month/
4. T.A – Class 1 officer dawn ang.
Sorkar lirthei kawl tir an ni lo. Amaherawhchu, Board tinin pool vehicle pahnih theuh an kawl thei. (Note : Assembly document ah hian hamthatna tihturah hmathatna tih vawi 2 a awm) (Pu KT Rokhaw MLA zawhna chhanna)
** Sports & Youth Services Deptt : Mizo infiam mite tan sorkar hna Group B, C leh D-ah 50% reserve sah an nih angin infiammi sorkar hna pek kan la nei lo. Kum 2020-2021 chhung hian Sports Discipline hrang hrang hnuaia infiammi te hnenah incentive cash award Rs 24,90,150/- pek an ni. Incentive Cash Award Rule 2005 hi siam that tuma hma lak mek a ni. (Pu C Lalsawivunga MLA zawhna chhanna)
** Health Deptt : Kum 2020 kum tawp lama Finance Deptt in Health Deptt pawisa hman dan an audit khan thil dik lo hmuh a ni lo. Engvanga hmanhmawh taka audit nge a nih chu Deptt lamin engmah hriat a nei lo (Pu Zodintluanga Ralte MLA zawhna chhanna)
** Finance : Jal Jeevan Mission (JJM) hnuaia sum hmuh zawng zawng la hriat kim theih loh mah se, kumin financial year thlenga JJM Fund dawn tur chu nuai 47,623 a ni a, kum thar lamah hmuh belh zel a ni ang. JJM hnuaia January ni 31, 2022 thlenga Central a?anga sum hmuh tawh chu nuai 32,429.25 a tling tawh a ni. (Pu Zodintluanga Ralte MLA zawhna chhanna)
** Law & Judicial Deptt : District thar pathum- Saitual, Hnahthial leh Khawzawlah Court din tumna a awm a, court din theih nan hma lak chhoh mek zel a ni a, hawn theih hun chu hriat a la ni lo. Mizoram Judicial Service-ah Post ruak 29 a awm a, post ruak ho hi hnawhkhah tura buaipui mek a ni. (Pu C Lalsawivunga MLA zawhna chhanna)
** Finance : SEDP hi state fund aanga dah a ni. Budget pangngai a?anga sawhhek a ni em tih chu, “Ni e’ tih a ni a, MNF ministry chu NDA member an nih avanga special package a SEDP hi siamsak a ni em? tih chu, ‘Ni lo” tia chhan a ni. (Pu Zodintluanga Ralte MLA zawhna chhanna)
** Health & Family Welfare Deptt : State hrang hranga RTPCR test man zat, Internet atanga an hmuh theih North East bik chu hetiang hi a ni. 1. Assam – Rs 250, 2. Arunachal Pradesh – Rs 500, 3. Manipur – Rs 2,400, 4. Tripura – Rs 850, 5. Meghalaya –Rs 500, 6. Sikkim – Rs 1,300, 7. Nagaland – Rs 800, 8. Mizoram – Rs 1,200 (Pu Lalduhoma MLA zawhna chhanna)
** Irrigation & Water Resources Deptt : Kum 2018 Dec atanga 2021 Dec inkarah Tender loha hna pek a awm lo. (Pu Zodintluanga Ralte MLA zawhna chhanna)
Post a Comment