Thenzawl, January 31, 2022 : Thenzawla doctor awm mek pathum zinga pakhat sorkarin a sawn chhuah duhlohna leh dodalna lantir nan nimin khan Thenzawl Joint YMA bultumin pawl hrang hrang ten Thenzawl field veng kawnah doctor sawnna thupek an hal.
Thenzawl Community Health Centre-a doctor awm mek pahnih zinga pakhat chu tun thla ni 25 khan Sialhawkah sorkarin sawnin Police Training School, Thenzawla doctor pakhat chu Thenzawl CHC ah hian dahin, PTS nena hmui tura tih a ni a.Hetianga doctor sawn an duhloh thu leh an dodal thu hi Thenzawl Joint YMA chuan thuchhuah an siam a, hemi hnu hian Joint VC leh MNF Block hruaitute hmalaknain sorkar chuan ni 28 khan thupek thar siamin PTS Thenzawla doctor awm lai chu Sialhawk PHC a awm tura tiin Thenzawl CHC a doctor pakhat zawk chu PTS puih turin tih a ni leh a ni.
Hemi chungchang hian Thenzawl Joint YMA huaihawtin inrinni zan khan Thenzawl khaw chhunga pawl hrang hrang inhmukhawm chuan khawtlang hruaitu ten ngenna an thehluh hnuah pawh an beisei ang ni lova Thenzawl atanga doctor sawn chhuahna thupek la awm tho chu hriatthiam harsa an ti takzet tih sawiin, Thenzawla doctor awmsa thlakna tur dah lova sawn chhuah tuman chu a tawp thlenga dodal zel an tum thu an sawi a. Hmalakna hmasa atan nimin tlai khan doctor sawn chhuahna thupek an hal a ni.
Post a Comment