Rauthla, January 26, 2022 : Nizan dar 8 vel khan Rihkhawdar camp-ah bomb ring takin vawili vel a puak a, Rihkhawdar leh Khawmawi mipui an chiai nasa hle.
Zokhawthar VCP Pu Mamuana sawi danin tunah hian Khawmawi leh Rihkhawdar lam atangin Mizoram lam, Zokhawthara rawn tlanchhia an rawn inhnawh nasa hle mai a, thlabara rawn tlanchhiate buaipuiin Zokhawthar mipui an buai hle.
Rihkhawdar chhak tlangah hian Myanmar buai tirh atang khan Myanmar sipai an inkulh a, sipai 10 bawr an awm thin. Civil mite lakah buaina an siam hran lova, civil lamin an han ti buai bik lova, an tha awm ve ve thin. Tunhnaiah Myanmar sipaite hian a awm hluite rawn thlakin Myanmar sipai 50 vel zet Rihkhawdar camp-ah hian an rawn lut ta a, awm tharte hian civil mite laka an inhrosak nan bomb hi an ti puak niin thenkhat chuan an ring a, a chhan chiah tuman an hre thei rih lo.
Lungmuang taka awm thinte kha, hetianga bomb a puah tak chiamah chuan an thla a bar hle mai a, an sahimna zawngin Hualngo khaw hrang hrang te'n Mizoram lam an rawn pan ta ruih ruih mai niin an sawi.
Post a Comment