Lawngtlai, January 25, 2022 : Vawiin, January 25, 2022 khan National Voters' Day (NVD) vawi 12-na chu Lawngtlai DC Conference Hall-ah District Election Officer, Lawngtlai Bawrhsap ni bawk Dr Andrew H. Vanlaldika hovin hman a ni.




Lawngtlai DEO Dr Andrew H. Vanlaldika chuan National Voters' Day chu Election Commission of India (ECI) din champha phakah hman thin a nih thu leh India ram democracy ropuina tar lanna pakhat a nih thu sawiin, khawvel ram zau zawk thlirin mipui rorelna (democracy) hlutzia a chiang thar leh thin tih a sawi a. India rama mipui rorelna chawi san zel leh inthlanna dik, felfai, mi tin huapzo leh mi tin tel theihna siam chu ECI-in a tum ber a nih thu sawiin, India khua leh tui kum sawmpariat tling chin tawh phawtin ram leh khawtlang hruaitu thlannaa mahni duh zawng thlan theihna zalenna leh chanvo an neih chu a tha zawng leh ram hmasawn nana hmang tangkai turin District mipuite a chah a ni.

He hun hi Election Officer Pi B. Malsawmtluangi chuan a kaihruai a. Assistant Electoral Registration Officer (AERO) Pu Lalthakima Chhangte, Lawngtlai BDO kaihhruaiin NVD thu tiam sawi rual a ni a. Systematic Voters' Education and Electoral Participation (SVEEP) Nodal Officer Pu C. Lalhruaitluanga, Lawngtlai DIPRO chuan powerpoint presentation hmangin SVEEP hma lakna tlangpui a tar lang a. Constituency pathuma Booth Level Officer (BLO) thawk tha bera thlante hnenah chawimawina thilpek hlan niin, bialtu Electoral Registration Officer (ERO) theuhte'n an hlan a. SVEEP hma laknaa Special Summary Revision of Electoral Rolls, 2022 puala nikum November thla chhunga social media challenge, 'Forms with BLO' (electoral roll-a chuang thar turte'n dilna an theh luh ruala an bialtu BLO thla an lakpuina social media-a tar langa intihsiakna) lawmman sem ni bawkin, kum tling thar, a tum khat nana electoral roll-a chuang tharte hnenah DEO chuan Electoral Photo Identity Card (EPIC) a sem a. AERO Pu H. Vanlalbiakzauva, Lawngtlai SDC chuan Chief Election Commissioner of India thuchah a chhiar chhuak bawk.

Best BLO chawimawina hlante chu - 36-Tuichawng bialah Pu Amulya Kumar Chakma, 36/14-Kamalanagar II 'S'; 37-Lawngtlai West-ah Pu Lalthupuia Khiangte, 37/4-Mualbu 'L' leh 38-Lawngtlai East-ah Pu H. VLMSD Lianchhunga, 38/20-Cheural te an ni a. 'Forms with BLO' challenge pakhatna lawmman chu Tv. Timothy A. Lalramtiama'n a dawng a ni.

Vawiina Lawngtlaia NVD hmannaah hian ERO (37-Lawngtlai West) Pi Marilyn Rualzakhumthangi, Project Director DRDA, ERO (38-Lawngtlai East) Pu James Miahlung, Additional DC, ERO (36-Tuichawng) Pi TT Beikhaizi, SDO (Sadar) bakah, official dangte leh District Election staff-te, SVEEP Core Committee member-te, BLO-te, political party hrang hrang ai awhte leh electoral roll-a chuang tharte an kal khawm a ni. 

Post a Comment

Powered by Blogger.