Rauthla, Editorial, January 27, 2022 : Hruaitu nihna dinhmun hi dinhmun pawimawh tak leh mawhphurhna lian tak a ni a. Kohhran leh pawl hrang hrang chak leh chak lohte, nun leh nun loh te, hmasawn leh sawn loh te hi pawl hruaitu kutah a innghat thui leh a ni. Hruaitu chak leh chak lo ah te, an that leh that loh ah te pawl hmalam hun leh kalzel dan tur hi thui tak a in nghat a ni. Hruaitu nihna dinhmun hi thil chakawm leh ropui tak anga a lan lai hian a huphurhawm a, hruaitu tha leh thiam nih pawh a har viau reng a ni. A bikin kohhran leh tlawmngai pawlah te phei chuan thiam bik vang emaw, that bik vang emaw, mahni in tling leh tha nia inhriat avanga hruaitu nihna dinhmun hi chelh a ni lem lo a, in hnawna, inbel chawp te, in nawr luiha mawhphurhna inpek te a nih thin avangin hruaitu nih hi a huphurhawm zual a, a zamawm zual thin. Chutiang karah chuan hruaitu nih duh avang lo khel an awm ta tlat thin hian pawl hi a ti zahawm lo fo thin a ni.
Hruaitu nih ngawt hi achievement a ni lova, hlawhtlinna a ni lo, ropuina a ni hek lo, hnathawh kawr a ni zawk, tiin mi thil chik mite chuan an sawi a. Pawl thil tum pawh ngaihtuah hauh lova, hruaitu nih khel leh line up siam thin kan awm thin hi a pawi tak zet a ni. Tunlai thangtharte zing ah phei hi chuan NGO ah chauh pawh ni lo, Kohhran thleng pawha line up lo buaipui kan awm ta nawk mai hi a pawi tak zet a ni. Hruaitu nih tuma lo khel an awm hian pawl a nung thei lova, hmasawnna a awm mawh thin khawp mai. Hruaitu kan nih chuan kan pawl in a tum kan hre chiang tur a ni a. Mahni inphat ngam khawp a, kan chet ve a ngai thin a ni.
Hruaitu nih hi thil ropui taka kan ngai anih chuan a fuh ber lo fo vang. Nihna duh viau si a, activity pawh nei tha peih lo hruaitu kan nih chuan chawlh ngam mai tur a ni. Ram hruaina kawngah pawh a ni tho e, sum leh pai therhlo ringawt ngaihtuah mi chu mipuite pawh hian hriat chian a, paihthlak ngam tur a ni. Pawl a ni emaw Kohhranah pawh, 'ka tih atan a mawi em' tih pawh ngaihtuah hauh lova, nihna kan chelh a nih chuan kan telna pawl hi a zahawm ngai dawn lo tih hi hruaitu ni chin te hi chuan chiang deuh taka kan hriat a hun ta. Chutiang hun a thlen hunah chuan ram, Kohhran leh khawtlang hian hma nasa takin a sawn ngei ang. Hruaitu nih hi ropuinaah ngai lova, hnathawh kawr kan ha tih hria a, theihtawpa tan lak hi a hun ta a ni.
Post a Comment