Champhai, January 24, 2022 : Champhai District NGO Co-ordination Committee-in Champhai bawrhsap Pi Maria CT Zuali sawnna thupek sut tura an hmalak zelna turah Champhai Sub. Headquarters YMA an tel tawh dawn lo.
Thudawn danin nizan hmasaa NGOCC thutkhawmna-ah hian Sub-Headquarters YMA hruaitute chuan an kal zelna tur chu a mimal thil deuh tawh a an hriat avang leh Republic Day boycott chu YMA tel vena chi-a an ngaih loh avangin tel zui an tum tawh loh thu an sawi a. Hetihlai hian NGOCC a tel pawl dangte chuan kal tlangpui an tum ni a thudawn a ni. Sub-Hqrs YMA hruaitute chuan central YMA hruaitute hnenah Chief Minister lo dawr tura an ngen ang leh an duhdan an sawi angin bawrhsap insawn hun pawhsei a lo ni tawh a, YMA chu pressure group a nih loh avangin tun hnu a tel zui zel chu an tan a rem lo ni a an hriat thu an sawi a ni.
Champhai NGOCC hian an district bawrhsap sawnna thupek sut tura sorkar an nawrnaah Zirtawpni khan Champhai khawpui a dawr khartir-in hma an la tan a. An ruahman lawk ang chuan vawiin Thawhtanni hian Champhai khawpui a kawngzawh huaihawt an tum a, naktukah sorkar pisa zawng zawng khartir an tum a. Nilaini Republic Day khian total bandh huaihawt a, Republic Day kawmserh an tum a ni.
Post a Comment