Lawngtlai, December 06, 2021 : Vawin December 6, 2021 khan Lawngtlaia Party hrang hrang pathum te, Indian National Congress, Bharatiya Janata Party leh Zoram People's Movement Lawngtlai District Headquarters te chuan 125th Constitution Amendment a nih theihna tura hmalakna awm mek tithuanawp zawnga Mizoram Sorkar MNF in Central Sorkarah thuthlen (Comments) a neih chu an duh loh zia leh sutlet leh an phutna lantirna hun Areopagy, Lawngtlaiah Programme an hmang a, he hunah hian Mizoram MNF Sorkarin Central Sorkara a dodal zawnga Comments a pekna Copy pawh hal ral nghal a ni. 



Vawiina hun hmannaah hian mipui pungkhawmte chuan an lungawilohnate au rualin an lantir bakah, hnam tlem zawkte hmasawn vena dodaltu Mizoram MNF Sorkar, Pu Zoramthanga kaihhruai pawh bang turin an phut thu au rualin an lantir a ni. He hunah hian Lawngtlaia Party pathum bakah NGO lam atangin, LSA General Headquarters : Lawngtlai hruaitu te an tel bawk.

He Protest neihnaah hian Lai DCC Headquarters : Lawngtlai President Pu J. Ropianga Chinzah chuan thusawiin, 'District Council hunlaia tanga District Council ni rual kha, vawin ni thlengin keini Lai, Mara leh Chakma te chu District Council kan la ni a, Mizoram erawh State hood dinhmunah 1986 khan hlankai a lo ni tawh a, vawinah hian Mizoram atang indan kan phut lo a, Mizoram chhunga awm chung hian India Constitution hnuaiah kan dikna leh chanvo, ADC mipuite kan lo changkan ve theihna tur kan dil chauh zawk a ni' a ti a. He thil hi Mizoram Sorkar pek tur pawh a ni lo a, a pe theitu Central Sorkar hnena min recomend mai hi kan phut zawk a ni a ti a, Lai DCC President chuan, 'hetianga kan in ti fo dawn a nih chuan U.T. hi kan dil lo ang tih pawh a sawi theih loh' a ti bawk.

BJP Lawngtlai District Advser Pu TT. Nohmung pawhin thusawiin, MNF leh Central Sorkar an inrem dawn (Peace Accord) khan rem ar ADC te hi min talh tep tawh a, khatih laia Prime Minister Pu Rajiv Gandhi khan min hum tawh zawk a ni a ti a, a tir atangin MNF hian ADC te hi a ngaimawh em em a, Pu Zoramthanga Sorkar a lo din hmasak zawk pawh khan Chakma ADC thiah a lo tum tawh a, khatih laia LADC CEM Pu Rohnuna khan nasa taka dodalin, Chakma ADC hi an thiat thei a nih chuan Lai leh Mara pawh hi kan bang dawn bik lo a, thei bawr khata rah ang kan nih avangin, pakhat an lawh theih chuan a dang pawh an lo thei dawn a ni a ti bawk a ni.

ZPM Lawngtlai District President Pu Mc. Lalramchhana pawh n thusawina neiin, he thil hi Political party te tan hamthatna a lak chi a ni lo a, ram leh hnam issue a nih a vangin kan zavai a kan vei a tul a, kan tanrual a tul tak zet a ni a ti bawk.

Post a Comment

Powered by Blogger.