Rauthla, November 03, 2021 : Tuirial Assembly bial bye-election ah MNF official candidate Pu K. Laldawngliana chu hneh takin thlan tlin a ni.
Thla kalta October ni 30-a Tuirial Assembly biala bye-election neih tak a vote tla te hi nimin zing dar 8:00 atang khan Govt. Kolasib College Multipurpose Hall ah chhiar a ni a, MNF official candidate Pu K. Laldawngliana chuan vote 5,820 hmuin hneh takin thlan tlin a ni.
Vote 17,911 awmna Tuirial Assembly biala bye-election ah hian vote 14,561 a tla a, vote tla hi za zelah 81.92 a ni a, K Laldawngliana, MNF candidate chuan vote 5820 hmu in amah hnaih ber tu ZPM official candidate Laltlanmawia chuan vote 4536 hmuin, K Laldawngliana’n a hnehna hi 1,284 zet a ni a, he bial inthlan lo awm tawha inhnehna sang ber nia hriat a ni. Congress party (INC) candidate Chalrosanga Ralte chuan 3927 hmuin, BJP candidate K Laldinthara’n 249 a hmu.
MNF party chuan thuchhuah siamin, Pathian leh mipuite zarah MNF Candidate K Laldawngliana hneh taka thlantlin a lo ni ta chu lawmawm an tih thu an sawi a. Tuirial bialah kum 2018 MLA inthlanpui aiin vote 1,636 zeta hma an sawn thu an tarlang bawk.
Congress party pawhin thuchhuah siamin, bye-election tluang taka neih ani chu lawmawm an ti a. Inthlanna buaipuitu official-te leh MPF-te, INC Official candidate Chalrosanga Ralte vote tute zawng zawng chungah Congress lawmthu sawiin, Tuirial bial MLA atana thlan tlin MNF Candidate K. Lal-dawngliana an lawmpui a, inthlan hma Tuirial bial tana an thutiam te tihlawhtling ngei turin duhsakna an hlan tih an tarlang.
ZPM thalaite pawhin K Laldawngliana lawmpui thu an sawi a. PC party pawhin MNF candidate K Laldawngliana hnehna sang tak changa thlantlin a ni ta chu an lawmpui tih sawiin, ram leh bial mipuite tana theihtawp chhuah turin duhsakna an hlan a ni.
District Election Officer Dr.H.Lalthlangliana chuan inthlan kaihhnawiha DEO Office-a thawktute leh Department hrang hrang atanga thawktu pawh chawpte bakah MPF leh YMA-te hmalaknaah lawmthu a sawi a ni.
Post a Comment