Siaha, November 04, 2021 : Vawiin, November 4, 2021 khan Mara Students' Organization (MSO) din champha vawi 56-na lawmna, Circuit House Siaha ah hman a ni a. MSO dintu, President hmasa ber Pu S. Hiato, Ex- minister leh MSO President leh hruaitu lo ni tawh ten an hmanpui.



MSO Gen. Hqrs. President CH Beikhochhi chuan inlawmna thuchah a sawi a. He hun hmanpuitu MSU Founder President Pu S. Hiato chuan, kum 1965-ah Shillong-ah Mara Students' Organization an din tih sawiin, a din champha lawmnaa a tel ve thei chu lawmawm a tih thu a sawi. Kan ram leh hnam tan ngaihtuahna seng tur leh zirlai pawl an nih anga zirlaiten hlawhtlinna duhawm zawk an neih theih nan hma la chhunzawm zel turin a fuih. Pu S. Hiato chuan, Mizoramah sawrkar hnuaiah hnaa luhna tur a van tawh avangin central service-ah Mara thalaite an luh theih nan theihtawp chhuaha hma la turin a fuih bawk.

He programme-ah hian Mara Thyutlia Py, Mara Chano Py leh MJA Siaha President te theuh chu sawm niin, thu an sawi a. MSO hruaitu lo nih tawh dangte pawhin fuihna thu an sawi a ni.

MSO din champha lawmnaah hian he pawl hruaitu lo ni tawh leh zirlai boral ta te sunna hun hman a ni a. Hrileng vanga mipui nawlpui tel theih tura programme huaihawt theih a nih loh avangin hruaitu lo ni tawh te leh sawm bik te nen lawm a ni. 



MSO hian an din champha lawmna pualin Calvary Healing Centre, Siaha-ah tanpuina an hlan bawk.

Post a Comment

Powered by Blogger.