Lawngtlai, November 03, 2021 : Nizan dar 8:30pm vel khan Pu B. Vanlalruata, h/o Lalrindiki (Didiki) Lawngtlai Council Veng chhunga Dinthara cheng chu Suartharah a tlahlum a, a ruang hi tukin zing dar 7:40am vel khan hmuh a ni.
Pu B. Vanlalruata hi a thianpa, Pateruata nen Tupuiah hian Sangha man tura kal an ni a. Nghalengluichhuaha Pi Maruati bukah an innghat a. Zan tira Sangha man tura an chhuak chu a thianpa, Patearuata chu tuipui chhak lamah a kal a, Pu B. Vanlalruata hi thlang lamah a kal thung. A thianpa Pateruata sawidanin Pu B. Vanlalruata hi a thlangah awmin, a eng a zuk hmu zuaia, a reh leh ta mai a, hemi hnu hian tuichhungah a eng ken hi a hmu thei bawk a. A ngaihtha lo chuan a thianpa hi a zuk ngaihven a. A'n auh leh a zawn ngial hnuah pawhin chhawntu leh hmuh mai tur a awm tak loh avangin a chesual ngei nia ngaiin helaia riak ve thote a pun a, an hmuh mai tak loh avangin khaw lamah an zualko ta a ni.
Hetia an chanchin hriat anih rual hian MTP, Tuipui Ferry Branch te leh YLA, Lawngtlai Council Veng Branch te chuan an chetsualna lam hi an pan nghal a. Rei ngial zawn a nih hnuah zan lamah chuan hmuh mai theih a ni dawn loh avangin a tuk zinga a zawn hna chhunzawm leh turin ruahmanna siam a ni a, Tuipui Ferry-ah hian YLA Lawngtlai Council Veng member engemawzat an riak bawk.
Tukin zing khan ruang hi zawn chhunzawm leh a ni a, dar 7:40am vel khan Suarthar ah a ruang hi hmuh a ni. A ruang chhartute sawi danin Pu B. Vanlalruata hi a sangha zawng suarah a indaisual niin an ngai.
Pu B. Vanlalruata (45) ruang hi vawiin dar 1:00pm ah Council Veng thlanmualah vui a ni ang. Anmahni hi LIKBK Dinthar Local Church-a lawi an ni.
Post a Comment