October 27, 2021 (Nilaini) zing dar 09:00 vel khan Republic Veng Presbyterian Biak In chu tlangval kum 21 a upa Lalremliana’n a suasam vak mai a, a thawm hi hriain thenawm hnaivaite an inpunkhawm hnuah manin Police-ah pek a ni ta a ni. Vawiin vek khan Court-ah hruai nghal a ni.
Pawikhawihtu hian Mixture lian, Rs. Nuai 2 chuang man bakah Khuang leh thildang a suamsam a, Bible, Hlabu leh lehkhabu chi hrang hrangte chu pawnah a theh darh nuai bawk. Rang taka hmutu awm lo se chuan Maicham a suasam zui ngeiin a rinawm.
Amah hi chuan tirtu a neih avanga hetianga che ta hi niin a insawi a, Pathianin ti rawh min ti, bawlhhlawh ka thian fai, a tih bakah a tira a bulhnaia zu kalte hi thahah a vau bawk. An man hma leh man hnuah thil tam tak a sawi nain a rilru a buai em avangin a thusawi te hi a tak nge dawt tih hriatthiam a har rih hle.
Mi tam zawk chuan pawikhawihtu hi misual tangrang, Pathian Biak In meuh pawh zahpah lo, Setana tirhkoh angin kan hmu mai thei. Mahse, a chanchin hrechiangtu tan erawh chutiang chu a ni ve hauh lo. Mi khawngaihthlak tak, Pathian duh ngawih ngawihtu a ni tlat.
Remliana hi Thenzawl leh Lunglei inkara kawngpui an khua Ramlaitui khawchhuak niin Thenzawlah an insawn a, a nu leh pa hi an inthen tawh nghe nghe. A pa hian nupui dang neiin Thenzawl Vengtharah an inbengbel.
Remliana te upa ber chu Ramlaituiah hian la awmin kohhran tana mi tangkai tak niin an musician neih thatte zinga mi a ni. Remliana te erawh hi chu a u, a farnu nen Aizawlah pheiin Republic Vengah an khawsaa, a rem rem an thawk mai thin. A farnu hian lehkha la zirin tunhnai lawk khan Bsc tha takin a pass nghe nghe a, Remliana hi an unau pahniha an mamawh thawkchhuaktu a tih ngam.
Mi inthlahrung tak, taima tak si, engmah thawh hreh nei lo a ni a, an inhlawhnaah pawh a inhlawhpuite thawh peih loh phur taka thawk thin a ni. A fate Aizawla an awm takah chuan Remliana nu hian Aizawl leh Thenzawl a kartawn a, ani hi sakhaw ngaihsak tak mihlim emaw hlimsang emaw kan tih ang chi hi a ni.
Remliana pawh hian thlakhat vel kal ta atang khan Pathianah harhtharna changin a hlim em em a, englai mai pawh hian Pathian thu a sawi a ni ber. An inhlawhnaa Vai awm vete chu a vei thin hle a, an ngaithla emaw ngaithla lo emaw, an hrethiam emaw hrethiam lo emaw a theih ang angin Pathian thu a hrilh mawlh mawlh zel.
Amah hrechiangtute sawi danin harhtharna a chan hnu hian Pathian lamah a tuihal zual niin a lang a, Pathian thu hi a chakin a chak huam huam ni berin a lang.
Vanduaithlak tak maiin kan ti dawn nge, tunhnai te atang khan amahah thil diklo engemaw a awm a, October 26 zana a status atangin a fim loh zia a hriat mai awm e. A chhungte pawhin an manganpui tan nia a lan mek laiin hetiang zawng hian a rawn che ta a ni.
Tawngtaipui a ngai tak zet.
Post a Comment