Lawngtlai, October 25, 2021 : Nikum April atanga kumin September thla thlengin Lawngtlai District chhungah naupuang kum tlinglo thil tisual mi 19 an awm a, naupang kum tling lo a bika enkawl ngai leh venhim ngai mi 63 an awm bawk.
District Child Protection Unit, Lawngtlai hnuaia Juvenile Justice Board hnuaiah hian nikum April atanga kumin Sepetember chhung khan mipa naupangin ina a chenpui, a laichin hmeichhe naupang a pawngsual/khuaikhem hi mi 5 an awm a, naupangin mahni duthua midang a va tinat/midanga hliam/na thlen hi 2 awmin, naupangin a neitu hriat lohva pawikhawih tuma mi ina lut hi mi 1 an awm bawk a, naupang pahnih aia tam khawtlang tibuai zawnga khawlaia insualbuai hi mi 9 an awm bawk. Tin, phalna nei lova napangin silai hmang, kawl leh an siam hi mi 1 awm bawkin, mihring chenna emaw bungraw dahna in atanga thil ruk chhuah 1 a awm bawk.
Child Welfare Committee hnuaiah hian naupang a bika enkawl ngai leh venhim ngai mi 63 an awm a, heng zinga hian naupang khuaikhem tawk an tam ber a, a huhoa insual naupang case a tam hle bawk a ni.
District Child Protection Unit, Lawngtlai chuan ram lian zawka thleng tura kan ngaih heng thil hrang hrangte hi kan District-ah a thleng tam ta hle tih an sawi a, puitling chunga thleng tura kan ngaih hleilennate, pawikhawihnate, hur sualna rawngkai lam sualna chi hrang hrangte chu naupangte chungah a thleng ve mek a ni an ti a. Heng naupangte hian enkawlna tha an dawn theihna tur leh kawng dik an zawh theih nan hian District Child Protection Unit, Lawngtlai chuan hma a la mek bawk a ni.
District Child Protection Unit, Lawngtlai chuan hetianga Lawngtlai District-a naupang case tamna chhan chu nu leh pa ten kan fate kan enkawl dan dik loh vang leh kan thlahthlam lutuk vang a ni an ti a, naupangte thanlenna kawngah kawng dik an zawh theih nan kan tanrual theuh a ngai a ni an ti bawk.
Post a Comment