Lawngtlai nula zaithiam Latei Hringngen chuan zanin hian a Music Video thar ‘A tha vek e’ tih chu a tichhuak dawn a, a Youtube chhanel ‘Latei Hringngen’ tihah thlir theih a ni ang.
Zorimawi Youtube channel-a a hla dah ‘Lungrunpui’ tih avanga Mizoram khawvel deng chhuak Latei Hringngen hi a hming pum chu H. Vanlaldinchhungi a ni a, unau pathum niin, a nu leh pa, H. Vanlalchhunga leh V. Vanlalthangi te nen New Vengpui, Lawngtlaiah an khawsa mek.
Latei Hringngen hian zai zirna em em nei lovin, a tet te atangin zai hi a tui a, Kohhran lamah leh High School velah te a zai lawp lawp thin. Zoram khawvelin an hriatna chu Zorimawi Youtube channel-a a music video dah ‘Lungrunpui’ tih chu a ni a, he hla hian entu (viewer) nuai 9 chuang a nei tawh a ni.
Tunah hian Latei Hringngen hian ‘A tha vek e’ tih music video chu puitlin tawhin, a music video pahnihna tur a ni.
Zaithiam dang ang lo takin Latei Hringngen hian hlaphuah a thiam a, a hlate hi a ma phuah vek niin, a thluk pawh hi ama siam vek a ni.
Latei Hringngen chuan a hlate hi Lawngtlai kutchhuak vek nise a duh a, record, shooting leh videographer pawh Lawngtlai a mi vek a ni. Latei Hringngen chuan, ‘Lawngtlai hi zai lamah kan hniam bik lova, amaherawhchu sang zawka inphochhuahna chance kan mamawh ve a. Tin, promote-tu tha kan mamawh em em a ni’ tih Rauthla chanchinbu a hrilh.
Post a Comment