Lawngtlai, October 21, 2021 : Nimin khan Information & Public Relations Department changtu EM Pu Lalropuia Chinzah chuan a Chamber-ah Mizoram Journalist Association, Lawngtlai District Member te kawmin LADC Information & Public Relations Department hmachhawp leh hmalakna hrang hrang a sawipui.
Pu Lalropuia Chinzah, EM i/c I&PR, LADC chuan LADC Calender 2022 siam mekah Lawngtlai District chhunga thlaklak lama tuimite tih hmasawnna anih beiseiin Calendar a chuang tur thlalak a duh apiang tan thehluh theih tura hun hawn a nih thu a sawi a, lawmman pawh siam tum a ni a, Calendar a chuang tura thlan phei chu lawmman tha tak siamsak a ni dawn a, Calendar hi a thlawn ngawta sem lovin mipui tana rit lovin a man pawh siam turin ruahmanna siam mek ani a ti.
Pu Lalropuia Chinzah chuan MJA Lawngtlai District te tana a hmachhawpte sawiin, kum thar lamah Press tour neih theih dan kawng a zawnpui tur thu leh an hmasawnna tur dappui a tum dante a sawi.
MJA Lawngtlai District President Pu Lalngheta Ralte pawhin thusawiin, ‘LADC Sorkarin EM thalai kan dinhmun hrethiam tak min pe a, kan hmasawn theihna tur min ngaihtuah pui thei nghal hi kan lawm hle a ni’ a ti.
Mizoram Journalist Association, Lawngtlai chuan LADC Sorkarin Welfare fund tur an pek thin avangin lawmthu an sawi a, District dangte pawhin an entawn thin thu an sawi bawk.
Post a Comment