Spanish club ropui Barcelona chuan an head coach Ronald Koeman chu a hna atangin an ban tih an puang.
Nizan khan Barcelona hian La Liga club vantlang Rayo Vallecano chu an hneh lova, dinhmun derthawng sa tawh a nih laiin, club board lam chuan Dutch coach hi an ban ta a ni.
Koeman hian tun season-a La Liga match 10 an khelhah vawi li chiah hnehna a chanpui thei a, league-ah pakuana a nih pui mek bawk. Europe inelna lian Champions League-ah pawh Koeman hi a che tha lo tluang hle a, match thum an khelh tawhah Barcelona chu vawi khat chiah chakin, group-ah pathumna an ni mek a, group stage paltlang lo thei dinhmunah an ding mek. Ronald Koeman hian kum 2020 khan Quique Setien chu thlakin Barcelona coach atan hian lakluh a ni.
Club president Joan Laporta chuan, Ronald Koeman an ban thu hi a puang a, Barcelona a enkawlnaah lawmthu sawiin, a hmalam hunah duhsakna a hlan a ni.
Barcelona hian head coach tur an melh nghal a, an midfielder hlui, tuna Al Sadd coach ni mek Xavi chu he hna thawk tur hian an duh niin report thenkhat chuan a tarlang.
Post a Comment