Mizoram Sorkar chuan Mizoram Sorkar hnuaia Secretary Level turin Pu Rosangzuala S/O F.Lalsanga, Luangmual, Aizawl chu Officer on Special Duty to Chief Minister Post a siam sak a, Nimin khan Notification tih chhuah a ni.


SECRETARY THAR CHU -

Ka hriat dan hi a dik vek em ka hre lo. Pu Rosangzuala hi MNF General Headquarters a Adviser ni lai a ni a, thiamna bik tak a neih hriat a ni lo.

Burma ram lam aṭanga chawrchhuak, hel pawlah te pawh lo ṭang tawh niin Bankok Jail-a a tan laiin Pu Isaac Muivah te kaltlanga tuna kan CM nen hian in hmelhriat ṭan niin an sawi. Manipur ah lutin  New Bazar, Chrachanpur ah chengin kum 2004 khan JD Ticket in MLA ah a ding bawk.


Mizorama a rawn chuan chhuah hnu ah Luangmualah in ṭha tak a din a, tunah an khawsa mek a ni. Kan CM nen hian an inzui nasa hle a, 2018 inthlan dawn pawh khan Mizoram pawn thlengin an zin dun nasa hle niin an sawi bawk. Tunah hian OSD (Secretary Level) hi engtiang taka ṭul a nih avanga pek nge ni ang? 


SECRETARY POST -

Thla khatah Cheng 1 a hlawh dawn a, Mizoram Sorkar hnathawk Secretary Level niin an Status a zawm dawn a ni. Hlawh hi dahṭha ta ila, Secretary hamṭhatna dang zawng zawng a chang dawn tho a ni. 


IAS emaw Central Service bakah MCS Senior Post ni thin Secretary Post, Party hruaitute kan in pe ṭhuai mai hi Mizoram ah a awm tawh ngai em ka hre lova, a lo awm tawh a nih pawhin a thleng khât hle in a rinawm. Sorkarna chelhtu ten duhsak taka a ruata an ruat a nih avangin Lehkhathiam Secretary te ai hian a chungchuang nghal nalh in a rinawm bawk.


Party Adviser ni a ram rawngbawl aiin OSD (Secretary Level) hmanga ram rawngbawl a ṭul tlatna kan hmuh sak a ni chêk ang a, CM nen Party atanga an in nghen rial bakah Sorkar hnathawk angin an in ngheng leh zual dawn tihna a ni a, an Combination hian ram tan eng tak hring chhuak ang maw? Party lam aṭang pawhin a thîk awm ve duh rem rem viau maithei.


TLIPNA -

UPSC beisei mektu (Aspirant) te tan chuan thlephnawpna tham a ni maithei. MNF hian Party anga an hma lakna nge CM mimal hmalakna tih leh Mizo mipuite ah a ṭulna leh pawimawhna em em hi min hriattir loh chuan ṭul ti lo kan va tam dawn em.

Post a Comment

Powered by Blogger.