Rauthla, September 20, 2021 : CYLA te chu September 17, 2021 atang khan Eastern Tour neiin, raltlan an pun leh tak avangin a hmunah an mamawh zualpui hriat chian sak leh lo la kal leh zel tur ten harsatna an tawh loh nan Relief Camp buatsaih chungchang chungchang chu an kal chhan a ni.
CYLA General Secretary Pu JH. Lalrindika hnen atanga thu dawn danin, Tuichhak tlangdung khuaah Rawlbuk, Cheural, Vartek khua ten Raltlan an la nei lova, a bak zawng khua ten Raltlan an nei vek tawh a. Pangkhua Saisihchhuah atang leh Archhuangkai atangin Raltlante hi an lo kal deuh ber a ni. Archhuangkai lam atanga lo kal te hian an kalkawngah harsatna lian tham an nei lo.
Saisihchhuah atanga lo kal te hian Lui kanna atana Lawng an chuan hi a tir lam khan chhungkaw pakhat tan Rs. 400/500 an chawi tlangpui a, Dt 17 Sept. 2021 atang khan a thlawnin thiarkai an ni. Amaherawhchu,Saisihchhuah atanga Pangkhua thleng kal nan Pickup leh SK 407 chuan man erawh a to hle a, pick up ah Rs. 4000 407 ah Rs. 5000 a ni daih a, Burma pawisa bak nei lote leh India pawisa a thleng chawp ngaite a ni nawk a,harsatna an nei fo. Tin, motor chuanna man zo lo te pawh an awm bawk. Hengte avang hian Lawng chuang te him nan Pangkhaw Branch te Life Jackket 10 pek an ni.
Pu JH. Lalrindika chuan, Saisihchhuah atanga Pangkhua lo chho thleng apiang Pangkhaw Branch YLA ten an khaw daiah chaw an lo pe vek zel tih a sawi a, Chaw an eikham hnu hian an kal duhna khua an pan ve ta thin a ni. Chhun nen zan nen a Duty ngai reng, Eirawngbawl ngai reng an nih avangin Generator kan dawn thar chu Pangkhaw Branch kutah kan dah a ni a ti.
CYLA te hian khaw hrang hranga Branch YLA te hnenah Raltlan ten an hman atan Damdawi an pek vek a, Buhfai, Silpaulin, Facemask te pawh an pe bawk.
Raltlante hian Mutpuan an thlachham deuh ber a, Bungbel pawh an nei chau viau. An va belh khaw hrang hrang ten an lo khawn khawm sak hmangin tunah hian an khawsa mek hlawm a ni.
Post a Comment