Lawngtlai 02.Sept,2021 : United States chuan Afghanistan-a Islamic State peng pakhat Kabul Airport bomb hmanga beia United States sipai 13 thihna thlentu Islamic State Khorasan Province (IS-K) chu vauin United States an hneh ta tihna a ni lo a ti.
President Joe Biden chuan “United States tihnat duhtute chu kan pel ral (hunt down) dawn che u a, in thil tih man chu in la hmu khawp dawn” a ti. United States sipai thlawhna hnuhnung berin Afghanistan a chhuahsan hnu rei lo teah America mipui hnena thuchah (address to the nation) sawiin, US President chuan Afghanistan atanga US sipai lak chhuah thutlukna chu a chhan (defend) a, Afghanistan chungchanga thutlukna chu chhuahsan leh thil punlun zel inkar, a khawi zawk nge tih a ni a ti a. Afghanistan-a sipai tam zawk thawnluh tur em ni ang tih duh thlan turah sipai hnuhkir chu thlan zawk a ni a ti. “Kumkhuaa indona chu ka pawtsei dawn lo va, kumkhuaa chhuahsan tur ka pawtsei zawk a ni” a ti.
United States sipaite chuan thawhlehni khan Afghanistan an chhuahsan a, America indona daih rei ber, buai nuai nuaina leh chirina tlan chhuahsanna a ni a ti. Joe Biden chuan “Terrorism avanga raltitna chu a kal zel a, mahse, a danglam takna chu ram dangah a darhzau ta a ni. Chuvang chuan kan tih dan pawh kan thlak a ngai a. Afghanistan leh ram danga terrorism chu kan do zel ang a, mahse, lei (ground)-a indona chu kan tih a ngai tawh dawn lo a ni” a ti.
President chuan Afghanistan-a America indona a tawp tak thu a sawinaah indona tawp lama American nuna chan thu a sawi chhuak a. Hlawhtling taka Afghanistan atanga United States inhnuhchhuah theihna chu US sipai leh sawrkar palaite huaisenna, themthiamna leh mahni inphata an huaisenna vang a ni a ti. US sipaite inhnuhkirnaa nun petu sipai 13te chu theihnghilh ngai an ni dawn lo a ti.
“Kha hnaah khan sipai 20 chuan hliam an tawk a, mi huaisen 13-in an nunna an hlan a, Anmahni leh an chhungte lakah lawmthu sawi kan ba nasa a, kan inpekna chu kan rul seng dawn lo va, mahse, kan theihnghilh ngai reng reng dawn lo a ni” a ti.
US President chuan indonain a tichhiat (war torn) ramah American sipaite chuan hlauhawm leh thihna boruak karah huaisen takin an duty an hlen a ni a ti a. An nunna chu an hnaa an rinawmna avang ni mai lovin mi dangte tana rawngbawlsak rilru puin an hlanin an hlen chhuak a ni a ti a. American leh Afghan te thiar chhuah chu indo hna (mission of war) a ni lo va, khawngaihna hna (mission of mercey) a ni zawk a ni a ti. Chutiang tak tur chua he mission hi duan a ni a, thawhrimna nasa tak hnuaia hlen chhuah tura duan a ni a, duan a nih ang taka hlen chhuah a ni a ti.
Post a Comment