Name : Vanlalthuami
Date of Birth : 15th June 1966 (54 yrs)
Husband Name : C. Lalnunsanga
Address : Salem veng, Lunglei
Qualification : ANM
Mobile No : 9612585650
Pi Vanlalthuami hian ANM Course chu 1988 ah Health Worker Training School, Civil Hospital Aizawl (Health Worker Training School Kulikawn a sawn tak) atanga zirchhuak in, Health Worker turin Health & Family Welfare Department hnuaiah kum 1988 atangin a thawk tan a. tunah hian Theiriat Sub Centre, Lunglei-ah Health Supervisor in a awm mek a ni.
Pi Vanlalthuami hi a pasal leh a fanu 2 te nen Salem Veng, Lunglei ah khawsa mekin, mi tizawk zawk lo, zaidam leh dik ni a ahriat ahchuan ding tlat thin mi a ni. BCM Salem Veng Kohhran ah lawi mek in Sunday School Zirtitrtu niin, BKHP lamah pawh OB nihna chelh thin a ni. Tin, MHIP lamah pawh a phak tawka inhmangin, hruaitu hlun chawimawina (OB kum 10 chin) hial dawng phak khawp a khawtlang tana mi inpe a ni.
FLORENCE NIGHTINGALE AWARD A DAWN DAN
Pi Vanlalthuami hian Sertlangpui Health Sub-Centre a a thawh lain Dt. 23. October, 1993 khan nau nei thi put nasa lutuk leh chhul tang thi maithei dinhmun a ding nunna a chhanchhuak a.
Sertlangpui khua hi Lunglei District a awm niin, hetih hunlai hian motor service pawh awm lovin, hmanrua leh damdawi pawh duh anga hmuh a harsa hle a. Pi Kawlziki w/o K. Rosangtuala chuan a fa 19 na tur neih tumin Dt 22.October.1993 zan 6:00pm atang khan a vei tan in Dt.23.October.1993 zinglam 3:00 am khan fanu duhawm tak Kg 3.00 a rit hring in naute pawh a tha hle a. Amaherawhchu, naute a pian chhuah zawh hnu hian thi nasa taka put in, a thichhuak hi 2.5 litre lai a tling a. Hetia a thi nasa taka a put lai hian a chhul lah chu a tang tlat mai bawk si a. Hmunpui lam zawk pan turin motor a awmloh maibakah ama dinhmun hi a hniam em em mai bawk si a.
Hetia a chhul a tan tlat vang hian a chhul lakchhuah tum a vawithum lai mai a beih hnu pawh a a chhul ala tan tlat vang hian beidawngin a chawlhsan hial a. Amah lah chu a thiput a nasat bakah a pum na vangin nikhaw hre mumal lovin(semi unconscious) a awm in tawngvai ruai reng mai bawk si a. A pum lah chu anat zual zel mai bakah thiput la reh thei silo chu theihtawp chhuah a enkawl zui zelin, a thiput a muan deuh theih beiseiin a mawng lam kamkangin eitur thil tuiril lam a eitir bakah Drip RL 1000 ml leh 1500 ml Dextrose a pe tel bawk a. Hetia beidawng deuh mai a an awmlai hian a damlo enkawl chuan “Thuamte, ka thi tho tho dawn, min zen leh rawh” tiin a ngen a.
Tichuan, a chhul lakchhuah tuma zen pahin amah puitu chuan a pum chu alo massage pah bawk a. A pum chu zen in a laihrui ahchuan zawi te te a pawt in a chhul chu alo chhuak ta hlawl mai a ni. Hetia a chhul a lakchhuah hian zing lam dar 9:00 am lai lo ri tawh in, a chhul hi darkar 6 lai a tang a ni. Hetia a chhul alo tlak takah chuan damtha takin a awm mai tawh dawn emaw antih hnu in, nihnih aliam chuan khawsik neiin alu chu na ati em em a, thi put nei lehin a rim lah chu a chhe em em a. A han enchain chuan thi duk deuh mai phawrh chhuak leh in damdawi an kawl ang ang a enkawlzui maibak duhthlan tur a awmloh vangin Tab. Amoxcicillin 500mg nikhat ah vawi hnih pe in a na zual chhawk nan Paracetamol a pe tel bawk a. Tin, heng damdawi a pek bakah hian Mizo damdawi Sarzuk zung leh a hnah chum pawlh tui te pe telin alo dam tha leh ta a ni.
Pi Vanlalthuam in nunna a chhan tak Pi Kawlziki hi tun thleng a la dam in, hemi tuma a fanu neih tak hi tha taka thangchho zelin, Hindi B.A lai zir zo in Sorkar a hna tha tawk thawkin a awm mek ani.
Nimin khan Florence Nightingale Award 2020 hi hlan a ni a. Florence Nightingale Award hi India ram chhunga nurse hnathawk tha bikte hnenah hlan thin niin hei hian Citation leh sumfai Rs.50,000 a keng tel a. India ram pum huapa Award hlanna hi Mizoram sawrkar Health & Family Welfare Department hnuaia Nursing hotute leh Award dawngtu ten Aizawla NIC video conference Centre atangin an lo zawm a. Pu R.Lalramnghaka IAS, Secretary H&FW chuan function hi hmanpuiin India President aiawhin Award hi Pi Vanlalthuami te hnenah hlan a ni.
Post a Comment