August 8, 1994 khan Imphal khawpui atanga km 30 vela hla, Nongpok Kakching-ah, Meitei chhungkuaa piang a ni.
Japan khawpui, Tokyo-a infiamna inkhawmpui lian, Olympic Games khelh meka he chanchin ziah lai thlenga India-in medal a la lak chhun hlawh chhuaktu, Manipuri ritchawi chak, Saikhom Mirabai Chanu hi August 8, 1994 khan Imphal khawpui atanga km 30 vela hla, Nongpok Kakching-ah, Meitei chhungkuaa piang a ni.
A chhungte hian kum 12 a nihin a chak bik riau hi an hre tan a. Ram atanga thingtuah an fawm pawhin a u mipate zawkin an ken zawh loh hi a keng zo tlat thin a, ritchawi lama inhmang turin an buatsaih tan ta a ni.
A chhungte hian an tifuh khawp mai a, 2020 Summer Olympics kal mekah hian Women’s 49 kg-ah pahnihna niin India a chawimawi rih hle.
Chanu hian tun hmain World Championship leh Commonwealth Games-ah medal a lo la nual tawh a. India sorkar chuan infiamna lama a thawh hlawk avangin Padma Shri a hlan tawh a. Kum 2018 khan sorkar laipui hian infiam mite chawimawina sang, Rajiv Gandhi Khel Ratna award a lo hlan tawh bawk.
Chanu hian 2014 Commonwealth Games, Glasgow-ah women’s 48 kg weight class-ah silver medal a la tawh a. 2018 Gold Coast-ah phei kha chuan games record siamin gold medal a la zui a. 2017 World Weightlifting Championships, Anaheim, California-a neihah gold la leh bawkin 2020 Summer Olympics hi intihsiakna a tel tawha a lian ber a ni.
Chanu-in khawvel hriat a hlawh tanna hi Glasgow khawpuia Commonwealth Games kha niin silver medal a la a. 2016 Rio Olympics-a inlan turin a tling zui a, women’s 48 kg category-ah a tel a; mahse, a vanduai a, hlawhtlinna chang lovin clean & jerk section-a vawi thum chawi a tum chu a ti thei lo vek.
Kum 2017 khan Anaheim, CA, United States-a World Weightlifting Championships-ah gold medal a la ta thung a. Women’s 48 kg category-ah hian competition record siamin a vaiin 194 kg zet a chawi (85 kg snatch leh 109 kg clean & jerk) a ni.
2018 Commonwealth Games-ah phei kha chuan India innghahna ber ni tawhin a vaiin 196 kg (86 kg snatch leh 110 kg clean and Jerk) a chawi a. Innghahna a nih ang ngeiin he intihsiaknaa India tana medal hmasa ber a la a ni.
A hlawhtlinna avang hian Manipur CM Biren Singh chuan Vaibelchhe 1 peiin, Additional SP (Sport) hna a pe bawk a. A thawh mekna Railway Minister Ashwini Vaishnaw chuan Vaibelchhe 2 an pek bakah a hnaah an kaisan tir dawn bawk a ni.
Post a Comment