Lawngtlai 4th August, 2021 : Mizoram BAR Association chuan nimin khan National Highway 306 dan chungchangah Gauhati High Court ah Public Interest Litigation (PIL) an thehlut tih an thuchhuah ah an tarlang.
MBA hian Central sawrkar, Assam sawrkar leh Mizoram sawrkar-ah te he National Highway 306 clan chungchanga hma la rang turin ziak in lehkha an thehlut tawh thu leh he an lehkha hian awmzia a nei lova. Mizoram mipuite hmakhua ngaiin Court-ah zualko mai chu a tha berah ngaiin PIL kan thehlut ta a ni, an ti.
He PIL hi Guahati High court, Aizawl Bench-ah file ni mahsela, Gauhati High Court Principal Bench, Guwahati, hnuaia awm anih avangin he PIL hi Aizawl Bench a sawi tur nge Gauhati -a Gauhati High Court Principal Bench-a sawi tur tih chu Gauhati High Court thuneitute lamin an ti chiang mai tura an ngaihthu MBA thuchhuah chuan tarlan a ni.
MBA thuchhuah chuan, “Nikum lama NH 306 dan pin chungchangah pawh MBA hian PIL No 68 of 2020 a lo file tawh a; he PIL hmasa hi eng emaw chen Gauhati High Court-a a inchiah hnuin nikum lama kawng dan kha a tawp zui tak avangin he PIL hmasa pawh hi titawp ve zui nghal a ni a. Chutih rualin hetiang thil a thleng leh anih chuan, a thara PIL hi file leh phalna (Liberty to file afresh) Gauhati High Court hian MBA hnenah hian a pe bawk a ni,” an ti bawk.
He an thuchhuah hian MBA President Anil Rinliana Malhotra leh General Secretary R.Lalhmingmawia te’n hming an ziah hnan a ni.
Mizoram leh Assam ram inkal pawhna dan chungchangah hian Mizoram Bussiness Coordination Committee pawhin Larsap pisa kal tlangin India President Ram Nath Govin a hnenah nimin khan lehkha an thawn bawk a. Sumdawng pawlte hian ni 26.07.2021 a Mizoram leh Assam inrina laia state pahnihte thu inhmuh thiam loh avangin Assam Sorkarin National Highway a dan chah leh Railway a tih chhiat chu India danpui bawhchhiatna lian tak a nih avangin India President chu rang taka inrawlh a, hma la nghal turin MBCC chuan a ngen a.
Mizoram chu India ram chhung, hmun kilkhawr a awm, kal pawhna tur leh bungraw lak luhna tur kawngpui pakhat chauh nei a nih hre renga Assam sorkarin Mizorama cheng zawng zawngte tana bungrua leh mamawh engkim lakluhna awmchhun an dang ping tlat hi MBCC chuan tha lo a tiin India khua leh tui unau kara chet lakna tha lo tak a ni tiin a rang thei ang bera Mizoram luhka kawngpui dan ti tawp nghal turin India President chu an ngen a ni.
Post a Comment